(ភ្នំពេញ)៖ នៅថ្ងៃទី២៦ ខែឧសភា ឆ្នាំ២០១៩ ជាថ្ងៃប្រវត្តិសាស្ត្រ ថ្មីមួយទៀតនៅក្នុងដំណើរការប្រជាធិបតេយ្យនៅកម្ពុជា ដែលដំណើរការបោះ ឆ្នោតជ្រើសរើសសមាជិកក្រុមប្រឹក្សារាជធានីខេត្ត និងសមាជិកក្រុមប្រឹក្សាក្រុងស្រុកខណ្ឌអាណត្តិទី៣ ត្រូវបានរៀបចំ និងបញ្ចប់ទៅដោយជោគជ័យ ក្រោមបរិយាកាសសុខសន្តិភាព និងត្រូវបានអ្នកសង្កេតការណ៍វាយតម្លៃ ថាប្រព្រឹត្តទៅប្រកបដោយភាពយុត្តិធម៌ ត្រឹមត្រូវ មានតម្លាភាព។
អង្គបោះឆ្នោតជាសមាជិកក្រុមប្រឹក្សាឃុំសង្កាត់ទាំង ១១ ៥៦៥ រូបក្នុងចំណោម ១១ ៥៧២ រូបស្ទើរតែ ៩៩,៩៤% បានអញ្ជើញទៅបោះឆ្នោតបំពេញកាតព្វកិច្ចក្នុងនាមជាតំណាង ពលរដ្ឋខ្មែរក្នុងការបោះឆ្នោត ជ្រើសរើសក្រុមប្រឹក្សាអាណត្តិទី៣នេះ។
ការបោះឆ្នោតជ្រើសរើស សមាជិកក្រុមប្រឹក្សារាជធានីខេត្ត និងក្រុមប្រឹក្សាក្រុងស្រុកខណ្ឌ អាណត្តិទី៣ នេះបានបង្ហាញយ៉ាងច្បាស់ពី ដំណើរការប្រជាធិបតេយ្យដ៏រស់រវើកនៅកម្ពុជា និងបានឆ្លុះបញ្ចាំងយ៉ាងពិតប្រាកដពី ឆន្ទៈប្រជាពលរដ្ឋក្នុងដំណើរការប្រជាធិបតេយ្យ។
ប្រជាធិបតេយ្យដែលកម្ពុជាបាន អនុវត្តតាមរយៈសន្លឹកឆ្នោត មិនមែនតាមរយៈបាតុកម្ម ការតវ៉ាតាមផ្លូវ ឬជាកុបកម្មដែលជាវប្បធម៌របស់ក្រុមគណបក្សប្រឆាំង ខ្មោចបក្សសង្គ្រោះជាតិដែលមាន សម រង្ស៊ី កឹម សុខា ធ្វើនាពេលកន្លងទៅឡើយ។ នេះជាមេរៀនសម្រាប់ក្រុមជនក្បត់ជាតិទាំងនេះថា ការបោះឆ្នោត គឺជាមធ្យោបាយស្របច្បាប់តែមួយគត់ ដើម្បីឡើងកាន់អំណាច តាមបែបប្រជាធិបតេយ្យ មិនមែនតាមមធ្យោបាយបដិវត្តន៍ពណ៌ ដូចក្រុមប្រឆាំងបានធ្វើឡើយ។
កម្ពុជាបានអនុវត្តយ៉ាងខ្ជាប់ខ្ជួនគោលការណ៍ ប្រជាធិបតេយ្យ ហើយកម្ពុជាបាន រៀបចំការបោះឆ្នោតជាទៀងទាត់ តាមការកំណត់ចាប់តាំងពី ការរៀបចំការបោះឆ្នោតលើកទី១ នាខែ ឧសភា ឆ្នាំ ១៩៩៣ រៀបចំដោយអង្គការសហប្រជាជាតិ ក្រោយពីមានកិច្ចព្រមព្រៀង សន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ ១៩៩១ ហើយចាប់តាំងពីឆ្នាំ ១៩៩៨ កម្ពុជាបានរៀបចំការបោះឆ្នោតដោយខ្លួនឯង រួមមានការបោះឆ្នោតជ្រើសតាំង តំណាងរាស្ត្រ ការបោះឆ្នោតជ្រើសរើសសមាជិកព្រឹទ្ធសភា ការបោះឆ្នោតជ្រើសរើស តាំងសមាជិកក្រុមប្រឹក្សាឃុំសង្កាត់ និងការបោះឆ្នោតជ្រើសរើស សមាជិកក្រុមប្រឹក្សារាជធានីខេត្ត និងសមាជិកក្រុមប្រឹក្សាក្រុងស្រុកខណ្ឌ សរុបទាំងអស់ប្រមាណ ១៥ លើកមកហើយ។
កម្ពុជាដើរឆ្ពោះទៅជាមុខជានិច្ចប្រកបដោយ ភាពវិជ្ជមានលើផ្លូវនីតិរដ្ឋ គោរព សិទ្ធិមនុស្ស និងប្រជាធិបតេយ្យ។ ក្រុមក្បត់ជាតិនៅក្រៅប្រទេសកំពុងតែ ឈឺចិត្តចុកឈាមដោយសារតែ មិនអាចបំផ្លាញសន្តិភាព និងការអភិវឌ្ឍរបស់កម្ពុជាបាន។ ហើយក្រុមជនក្បត់ជាតិនៃ ខ្មោចបក្សសង្គ្រោះជាតិក៏កំពុងឈឺចិត្តព្រោះ ឃើញប្រជាពលរដ្ឋគាំទ្រពេញទំហឹង ដំណើរការប្រជាធិបតេយ្យនៅកម្ពុជាផងដែរ។
ក្រុមក្បត់ជាតិរត់ចោលស្រុកពិតជា មិនសប្បាយចិត្តឡើយពេលឃើញ កម្ពុជារស់ក្នុងសុខសន្តិភាព និងការអភិវឌ្ឍ ហើយក៏មិន អបអរសាទរឡើយ ពេលដែលឃើញដំណើរការប្រជាធិបតេយ្យ នៅកម្ពុជាមានសុខភាពល្អ និងកាន់តែរឹងមាំ ខុសពីអ្វីដែលពួកគេដើរបំភ័យពិភពលោកថាប្រជាធិបតេយ្យនៅកម្ពុជាកំពុងជួបវិបត្តិធ្ងន់ធ្ងរ ឬបានស្លាប់បាត់ទៅហើយក្តី។
ផ្ទុយទៅវិញ លទ្ធិប្រជាធិបតេយ្យកម្ពុជា មានភាពរឹងមាំកាន់តែខ្លាំង នៅពេលដែលគ្មានក្រុមអ្នកនយោបាយមាន់សម្លរ គ្មានក្រុមជនយកនយោបាយធ្វើអាជីវកម្ម គ្មានក្រុមកញ្ជះបរទេស និងគ្មានវត្តមានក្រុមជន ខ្សែស្រឡាយក្បត់ជាតិនៅលើទឹកដីកម្ពុជា រំខាន បំផ្លិចបំផ្លាញ និងបង្អាក់ដំណើរការ។
តាមពិត ពួកគេបានព្យាយាមបំផ្លាញឫសគល់ ប្រជាធិបតេយ្យនៅកម្ពុជាតាមរយៈបដិវត្តន៍ពណ៌ ដែលទទួលបញ្ជា ពីចៅហ្វាយនាយបរទេសរបស់ពួកគេ និងបានយកមកផែនការមកអនុវត្តនៅកម្ពុជា ក្នុងចេតនាផ្តួលរំលំរាជរដ្ឋាភិបាលស្របច្បាប់ ប៉ុន្តែពួកគេបានទទួលបរាជ័យយ៉ាងអាម៉ាស់បំផុត រហូតដល់ខ្លះត្រូវបានចាប់ខ្លួន និងខ្លះទៀតរត់ចោលស្រុកប្រាស់អាយុរហូតមកទល់ពេលនេះ។ ចំណែកអង្គការចាត់តាំងផ្នែកនយោបាយនៃបដិវត្តន៍ពណ៌ត្រូវបានរំលាយតាមច្បាប់ ហើយមន្ត្រីជាន់ខ្ពស់ជាសមាជិកអចិន្ត្រៃយ៍ និងគណៈកម្មការកណ្តាលនៃបក្សនេះត្រូវបានហាមឃាត់សិទ្ធិធ្វើនយោបាយរយៈពេល ៥ ឆ្នាំ។
ពលរដ្ឋខ្មែរពិតជា រីករាយចំពោះដំណើរការប្រជាធិបតេយ្យ សេរីពហុបក្សនៅកម្ពុជា ហើយពលរដ្ឋខ្មែរគាំទ្រជានិច្ចដំណើរការ ប្រជាធិបតេយ្យដែលពោរពេញដោយ ការគោរពសិទ្ធិមនុស្ស សេរីភាព បញ្ចេញមតិនៅពេលនេះ។ គ្មានក្រុមអ្នកស្នេហាជាតិតែលើបបូរមាត់ និងគ្មានក្រុមអ្នកប្រជាធិបតេយ្យក្លែងក្លាយ គ្មានក្រុមធ្វើនយោបាយប្រជាភិថុតិដូចសម រង្ស៊ី និងបក្ខពួក កម្ពុជាពិតជារស់ក្នុងស្ថិរភាពពិតប្រាកដ និងមានឱកាសពេញលេញកសាងនិងអភិវឌ្ឍជាតិ ជាពិសេសក្រោយការបោះឆ្នោត គ្មានការឡាំប៉ាតវ៉ាប្រឆាំងនឹងលទ្ធផលបោះឆ្នោតជាថ្នូរនិងការបែងចែកអំណាចឡើយ។
បទពិសោធក្រោយការបោះឆ្នោតជ្រើសតាំង តំណាងរាស្ត្រនីតិកាលទី៦ និងការបោះឆ្នោតជ្រើសរើសសមាជិកក្រុមប្រឹក្សាខេត្តរាជធានី និងក្រុមប្រឹក្សាក្រុងស្រុកខណ្ឌ ប្រជាជនកម្ពុជាគ្មានការព្រួយបារម្ភអ្វីឡើយ អ្វីៗដំណើរកា ជាប្រក្រតី។ នេះជាអ្វីដែលប្រជាពលរដ្ឋខ្មែរប្រាថ្នាចង់បាន៕
ដោយ៖ ចៅចាក់ស្មុក រាជធានីភ្នំពេញ ថ្ងៃទី២៦ ខែឧសភា ឆ្នាំ២០១៩
