(ភ្នំពេញ)៖ បន្ទាប់ពីទទួលសំណុំរឿង នៅយប់ថ្ងៃទី១៨ ខែឧសភា ឆ្នាំ២០១៩នេះ តំណាងអយ្យការ អមសាលាដំបូងរាជធានីភ្នំពេញ បានបញ្ជូន ប្រធានក្រុមហ៊ុន GCG ASIA ទៅអង្គភាពនគរបាលយុត្តិធម៌ ដោយរង់ចាំបន្តនីតិវិធីនៅថ្ងៃស្អែក។ នេះបេីតាម លោក លី សុផាណា អ្នកនាំពាក្យ តំណាងអយ្យការ អមសាលាដំបូងរាជធានីភ្នំពេញ។

លោកបញ្ជាក់ដូច្នេះថា «ក្រោយពីបានទទួល និងពិនិត្យសំណុំរឿងព្រមទាំងសាកសួរចម្លើយលើឈ្មោះ YAW FOO HOE នារសៀលថ្ងៃនេះ តំណាងអយ្យការបានសម្រេចរក្សាទុកជនសង្ស័យនៅអង្គភាពនគរបាលយុត្តិធម៌ដើម្បីបន្តនីតិវីធីនៅថ្ងៃស្អែកទៀត»។

ប្រធានក្រុមហ៊ុនខាងលើនេះ ត្រូវបានសមត្ថកិច្ចចាប់ខ្លួនជាមួយប្រពន្ធរបស់គេ កាលពីថ្ងៃទី១៧ ខែឧសភា ឆ្នាំ២០១៩ ម្សិលមិញ ប៉ុន្តែបើតាមសមត្ថកិច្ច ក្រោយពីសួរនាំ ស្រ្តីជាប្រពន្ធដែលរងការចាប់ខ្លួនជាមួយប្តីនោះ ត្រូវបានសមត្ថកិច្ចអនុញ្ញាតឲ្យត្រឡប់ទៅវិញ ដោយសាររកមិនឃើញមានការជាប់ពាក់ព័ន្ធនឹងបទល្មើសមួយនេះ។

អគ្គស្នងការនគរបាលជាតិ នាយឧត្តមសេនីយ៍សន្ដិបណ្ឌិត នេត សាវឿន បានថ្លែងប្រាប់បណ្ដាញព័ត៌មាន Fresh News ឲ្យដឹងថា ក្រុមហ៊ុន GCG ASIA Co., LTD ជាក្រុមហ៊ុនឆបោកលក្ខណៈអន្ដរជាតិ ហើយប្រទេសជាច្រើននៅតំបន់អាស៊ី បានរងគ្រោះដោយសារក្រុមហ៊ុននេះរួចហើយ។

នាយឧត្តមសេនីយ៍ នេត សាវឿន បានបញ្ជាក់ផងដែរថា ក្រោយកម្លាំងនគរបាលជំនាញ ជួបប្រជុំជាមួយមន្ដ្រីធនាគារជាតិបានរកឃើញថា ក្រុមហ៊ុនមួយនេះ មិនបានចុះបញ្ជីត្រឹមត្រូវជាមួយ ធនាគារជាតិ និងក្រសួងស្ថាប័នពាក់ព័ន្ធនោះឡើយ ហើយពីមុនក្រុមហ៊ុននេះ ធ្លាប់រកស៊ីបោកប្រាសនៅប្រទេសម៉ាឡេស៊ី និងឥណ្ឌូនេស៊ីជាដើម ហើយត្រូវបានអាជ្ញាធរប្រទេសទាំងនោះដឹង ហើយក៏បានរត់ចេញមកបោះមូលដ្ឋាននៅកម្ពុជា។

អគ្គស្នងការនគរបាលជាតិ បានបញ្ជាក់ថា ពលរដ្ឋខ្មែរ មិនទាន់ចាញ់បោកក្រុមហ៊ុននេះនៅឡើយទេ មានភាគច្រើនតែជនជាតិចិន ព្រោះក្រុមហ៊ុននេះដាក់លក់តែនៅ ក្រៅប្រទេសប៉ុណ្ណោះ ប៉ុន្តែមានស្នាក់ការនៅកម្ពុជា។

ជាមួយគ្នានេះ នៅក្នុងប្រតិបត្តិការចុះឆែកឆេរនៅព្រឹកថ្ងៃទី១៧ ខែឧសភា ឆ្នាំ២០១៩ សមត្ថកិច្ចក៏បានឈានទៅដល់ការបិទក្រុមហ៊ុនជាបណ្ដោះអាសន្ន។

សូមបញ្ជាក់ថា ក្រុមហ៊ុន GCG Asia Co., LTD ដែលបានយកឈ្មោះ និងរូបសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ទៅបង្ហោះក្នុងគេហទំព័ររបស់ខ្លួន ដោយខុសច្បាប់ និងមានប្រតិកម្មភ្លាមៗ ពីប្រមុខនៃរាជរដ្ឋាភិបាលនោះ ត្រូវបានសមត្ថកិច្ច មន្រ្តីធនាគារជាតិ និងមន្រ្តីគណៈកម្មការមូលបត្រកម្ពុជា ចុះទៅបិទជាបណ្ដោះអាសន្ន នៅសង្កាត់វត្តភ្នំ ខណ្ឌដូនពេញ នាព្រឹកថ្ងៃទី១៧ ខែឧសភា ឆ្នាំ២០១៩៕