(ភ្នំពេញ)៖ គណៈគ្រប់គ្រង និងបុគ្គលិក នៃមន្ទីរសំរាកព្យាបាលកម្ពុជា នៅថ្ងៃទី១២ ខែមេសា ឆ្នាំ២០១៩ បានរៀបចំការសម្តែងរបាំត្រុដិ និងមានកម្មវិធីលេងល្បែងប្រជាប្រិយ ដើម្បីចូលរួមអបអរសាទរ បុណ្យចូលឆ្នាំ ប្រពៃណីជាតិខែ្មរ ដែលនឹងប្រព្រឹត្តទៅនៅថ្ងៃទី ១៤-១៥-១៦ ខែមេសា ខាងមុខនេះ។

របាំត្រុដិ ជារបាំប្រពៃណីមួយ ដែលជាកេរ្តិ៍ដំណែលមកពីប្រជាជនសម្រែ តាំងពីរាប់ពាន់ឆ្នាំមុន និងមានដើមកំណើត នៅខេត្តសៀមរាប។ នៅក្នុងយុគសម័យអង្គរ ប្រជាជនសម្រែ បានសម្តែងរបាំត្រុដិនេះ ថ្វាយព្រះរាជា នាឱកាសបុណ្យចូលឆ្នាំថ្មី និងជាការបញ្ជាក់អំពីការដាច់ឆ្នាំចាស់ ផ្លាស់ចូលឆ្នាំថ្មី ប្រកបដោយសិរីសួស្តី ដល់ព្រះមហាក្សត្រផងដែរ ។

ហេតុដូច្នេះហើយ ជារៀងរាល់ឆ្នាំ ជាពិសេសពេលចូលឆ្នាំប្រពៃណីជាតិខ្មែរ របាំត្រុដិតែងតែទៅសំដែងនៅតាមផ្ទះ ឬទីលានវត្តអារាម ដើម្បីកាត់ផ្តាច់នូវឧបទ្រុបចង្រៃឆ្នាំចាស់ ផ្លាស់មកសិរីសួស្តី ដល់ឆ្នាំថ្មីរហូតមកដល់ពេលបច្ចុប្បន្ន។

លោកស្រី សេង ធានី ប្រធានផ្នែកទំនាក់ទំនងសាធារណៈ នៃមន្ទីរសំរាកព្យាបាល កម្ពុជា បានថ្លែងបញ្ជាក់ថា គណៈគ្រប់គ្រង នៃមន្ទីរសំរាកព្យាបាល កម្ពុជា មានគោលបំណងសំខាន់បី ដែលនាំឲ្យមានការរៀបចំ ការសម្តែងរបាំត្រុដិ និងកម្មវិធីលេងល្បែងប្រជាប្រិយនេះទ្បើង រួមមាន៖

ទី១៖ គឺដើម្បីលើកកំពស់ និង អភិរក្សកេរ្តិ៍ដំណែលវប្បធម៌ដ៏ផូរផង់របស់ដូនតាយើង ដែលបន្សល់ទុកតាំងពីបុរាណកាលមក ឲ្យភ្ញៀវជាតិ និងអន្តរជាតិ ដែលបានមកទទួលសេវា នៅមន្ទីរសំរាកព្យាបាលកម្ពុជា បានទស្សនា និងស្វែងយល់អំពីតម្លៃនៃវប្បធម៌ខ្មែរ។
ទី២៖ ដើម្បីបណ្តេញឧបទ្រពចង្រៃ និងដើម្បីនាំមកនូវសិរីសួស្តីសម្រាប់ឆ្នាំថ្មី ជូនដល់អ្នកជំងឺ បុគ្គលិក គណៈគ្រប់គ្រង និងប្រជាជនទូទៅ។
ទី៣៖ គឺដើម្បីផ្តល់ឱកាស ដល់បុគ្គលិកបានចូលរួមកម្សាន្ត សប្បាយ ក្រោយការខិតខំបំពេញការងារពេញមួយឆ្នាំ និងបន្តការខិតខំសំរាប់ឆ្នាំថ្មី តាមរយៈការចូលរួមលេងល្បែងប្រជាប្រិយ ដែលរួមមាន៖ បោះអង្គញ់ ចោលឈូង ទាញព្រ័ត្រ លាក់កន្សែង និងវាយក្អមជាដើម ។

លោកស្រី សេង ធានី បានបញ្ជាក់ទៀតថា មន្ទីរសំរាកព្យាបាល កម្ពុជា នឹងបន្តចូលរួមលើកកម្ពស់ និង អភិរក្សកេរ្តិ៍ដំណែលវប្បធម៌របស់ដូនតា ជារៀងរាល់ឆ្នាំ៕