(បន្ទាយមានជ័យ)៖ សិស្សានុសិស្ស៧៧៨នាក់ នៅសាលាបឋមសិក្សាភូមិរការថ្មី ឃុំស្វាយចេក ស្រុកស្វាយចេក ខេត្តបន្ទាយមានជ័យ បានទទួលអំណោយជា សម្ភារសិក្សា និងថវិកាមួយចំនួនរបស់លោក អូស្មាន ហាស្សាន់ ទេសរដ្ឋមន្រ្តីទទួលបន្ទុកបេសកកម្មពិសេស ក្នុងម្នាក់ៗទទួលបាន សៀវភៅ២ក្បាល ប៊ិច១ ខ្មៅដៃ១ បន្ទាត់១ ជ័រលុប១ និងថវិកា២០០០រៀល ចំណែកលោកគ្រូ អ្នកគ្រូ២៩នាក់ ក្នុងម្នាក់ៗថវិកា៥ម៉ឺនរៀល ព្រមទាំងឧបត្ថម្ភសម្ភាកីឡាដល់សាលាផងដែរ។
ការប្រគល់អំណោយនេះ ធ្វើឡើងដោយសមាគមសម្ព័ន្ធយុវជនមុស្លិមកម្ពុជា (ស.យ.ម.ក) សាខាខេត្តបន្ទាយមានជ័យ នៅរសៀលថ្ងៃទី១៤ ខែមីនា ឆ្នាំ២០១៩ ដឹកនាំដោយ លោក ស្លៃម៉ាន មូសា ប្រធាន ស.យ.ម.ក សាខាខេត្តបន្ទាយមានជ័យ ព្រមទាំងមានការចូលរួម ពីលោកប្រធានគណៈដឹកនាំជាន់ខ្ពស់ នៃសាសនាឥស្លាម ខេត្តបន្ទាយមានជ័យ សមាជិក សមាជិកាស.យ.ម.ក និងស.ស.យ.ក និងអជ្ញាធរមូលដ្ឋាន។
គួរបញ្ជាក់ថា សាលាបឋមសិក្សាភូមិរការថ្មី ឃុំស្វាយចេក គឺជាអតីតសាលាបឋមដែល ទេសរដ្ឋមន្រ្តី អូស្មាន ហាស្សាន់ ធ្លាប់សិក្សាថ្នាក់បឋម កាលនៅកុមារភាព គឺអាយុប្រមាណ៨ឆ្នាំ។ នេះបើយោងតាមការជម្រាបផ្ទាល់របស់ លោកក្នុងឱកាសដែលអញ្ជើញសួរសុខទុក្ខ សំណេះសំណាលជាមួយសិស្សានុសិស្ស និងលោកគ្រូ អ្នកគ្រូសាលានេះ កាលពីថ្ងៃទី១៦ ខែកុម្ភៈ ឆ្នាំ២០១៩កន្លងទៅ៕
