(កំពង់ចាម)៖ បន្ទាប់ពីទទួលបានព័ត៌មានពីប្រជាពលរដ្ឋ ស្នងការខេត្តកំពង់ចាម លោកឧត្តមសេនីយ៍ទោ ឯម កុសល បានបញ្ជាកម្លាំងជំនាញរបស់អធិការដ្ឋានស្រុកស្ទឹងត្រង់ សហការជាមួយកម្លាំងប៉ុស្តិ៍នគរបាលរដ្ឋបាលអូរម្លូ និងអាជ្ញាធរមូលដ្ឋាន បានចុះបង្រ្កាបទីតាំងលួចលេងល្បែងស៊ីសងខុសច្បាប់ (ជល់មាន់ដាក់លុយ) ចំនួនមួយកន្លែង នៅចំណុចចំការកៅស៊ូ ស្ថិតក្នុងភូមិស្ពង់សាខាចាស់ ឃុំអូរម្លូ ស្រុកស្ទឹងត្រង់។
លោកឧត្តមសេនីយ៍ទោ ឯម កុសល បានប្រាប់អង្គភាព Fresh News ឲ្យដឹងថា ប្រតិបត្តិការនៅថ្ងៃទី០១ ខែមីនា ឆ្នាំ២០១៩នេះ នៅពេលកម្លាំងនគរបាលចុះទៅដល់កន្លែង មុខសញ្ញាសង្ស័យបាននាំគ្នារត់គេចខ្លួនបាត់អស់ ដោយបន្សល់វត្ថុតាងរួមមានតង់កៅស៊ូ, ស៊ុមក្រុងមាន់, សម្ភារសម្រាប់ជល់មាន់មួយចំនួនទៀត។
បច្ចុប្បន្នវត្ថុតាងខាងលើ ត្រូវបានសមត្ថកិច្ចនាំមកកាន់អធិការដ្ឋាននគរបាលស្រុកស្ទឹងត្រង់ ដើម្បីធ្វើការស្រាវជ្រាវបន្ត ចំណែកតង់កៅស៊ូ និងសម្ភារផ្សេងទៀតសមត្ថកិច្ចបានដុតបំផ្លិចបំផ្លាញចោលនៅកន្លែងកើតហេតុខាងលើ តាមបញ្ជារបស់លោក ហួត វុទ្ធី ព្រះរាជអាជ្ញាអមសាលាដំបូងខេត្តំពង់ចាម៕
