(តូក្យូ)៖ លោក ស៊ីនហ្សូ អាបេ កំពុងស្ថិតនៅលើផ្លូវឆ្ពោះទៅរកការកាន់អំណាច ជានាយករដ្ឋមន្ត្រីជប៉ុនយូរជាងគេ និងដើម្បីសម្រេចគោលបំណងធ្វើវិសោធនកម្មរដ្ឋធម្មនុញ្ញសន្តិនិយម បន្ទាប់ពីលោកបានជាប់ឆ្នោតជាថ្មីម្ដងទៀត ក្នុងនាមជាមេដឹកគណបក្ស កាន់អំណាចរបស់លោក កាលពីថ្ងៃព្រហស្បតិ៍ និងត្រៀមដើម្បីប្រកួតប្រជែង ក្នុងការបោះឆ្នោតជាតិនាពេលខាងមុខ។ នេះបើតាមការចេញផ្សាយដោយសារព័ត៌មាន Channel News Asia នៅព្រឹកថ្ងៃសុក្រ ទី២១ ខែកញ្ញា ឆ្នាំ២០១៨។
លោក អាបេ ដែលមានអាយុ ៦៣ឆ្នាំ បានទទួលការគាំទ្រ ៥៥៣សំឡេងពីសមាជិកសភា និងសមាជិកគណបក្សកាន់អំណាច ខណៈគូប្រជែង របស់លោកគឺអតីតរដ្ឋមន្ត្រីការពារជាតិជប៉ុន លោក ស៊ីហ្គែរុ អ៊ីស៊ីបា (Shigeru Ishiba) ទទួលបានសំឡេងគាំទ្រ ២៥៤សំឡេង នៅក្នុងការប្រកួតប្រជែងយកតំណែងជាប្រធានគណបក្សប្រជាធិបតេយ្យសេរី (LDP)។
គួរបញ្ជាក់ថា នៅក្នុងសំឡេងបោះឆ្នោតទាំង ៨១០សំឡេង មាន ៨០៧សំឡេង មានសុពលភាព។ លោក អាបេ ដែលបានឡើងកាន់តំណែងជានាយករដ្ឋមន្ត្រីជប៉ុន តាំងពីឆ្នាំ២០១២មក បានសន្យាជម្រុញកំណើនសេដ្ឋកិច្ច និងធ្វើវិសោធនកម្មរដ្ឋធម្មនុញ្ញ
សន្តិនិយមដើម្បីពង្រឹងវិស័យការពារជាតិឡើងវិញ។
លើសពីនេះទៅទៀត ជ័យជម្នះរបស់លោកនៅពេលនេះ នឹងផ្ដល់ឱកាសឱ្យ លោកបន្តធ្វើជានាយករដ្ឋមន្ត្រីរយៈពេល ០៣ឆ្នាំបន្ថែមទៀត ព្រមទាំងបំបែកកំណត់ត្រាជានាយករដ្ឋមន្ត្រីជប៉ុន កាន់អំណាចយូរជាងគេរបស់លោក តារ៉ូ កាត់ស៊ូរ៉ា (Taro Katsura) ដែលធ្លាប់កាន់តំណែងនេះបីដងនៅឆ្នាំ១៩០១ និង១៩១៣៕
