(តូក្យូ)៖ អាជ្ញាធរជប៉ុន​បានអះអាង​នៅថ្ងៃអង្គារនេះថា ចំនួនមនុស្ស​ស្លាប់ដោយសារ​បំណាក់ដី និងគ្រោះ​ទឹកជំនន់ ដែលបង្កឡើង ដោយភ្លៀងធ្លាក់​យ៉ាងជោគជាំ នៅតាមតំបន់​ភាគខាងលិច​ប្រទេសជប៉ុន បានកើនដល់ ១៤១នាក់ហើយ រីឯមនុស្សបាត់​ខ្លួនរាប់សិប​នាក់ ទៀតត្រូវបានគេជឿជាក់​ថា ជាប់ក្រោម​ល្បាប់ភក់។ នេះបើតាម​ការចេញផ្សាយ​ដោយ ទីភ្នាក់ងារ​សារព័ត៌មាន Reuters នៅព្រឹកថ្ងៃចន្ទ ទី១០ ខែកក្កដា ឆ្នាំ២០១៨។

ឆ្លើយតបចំពោះគ្រោះមហន្តរាយដ៏ធ្ងន់ធ្ងរមួយនេះ រដ្ឋាភិបាលជប៉ុន បានបញ្ជូនប៉ូលិស ក្រុមអ្នកពន្លត់អគ្គិភ័យ និងកងទ័ពជាង ៧៣,០០០នាក់ រួមទាំងឧទ្ធម្ភាគចក្រ ៧០០គ្រឿង ឱ្យទៅចូលរួមក្នុងប្រតិបត្តិការរុករក និងជួយសង្រ្គោះនៅតាមតំបន់រងគ្រោះធ្ងន់ខ្លាំង ដូចជាខេត្តហ៊ីរ៉ូស៊ីម៉ា ដែលមាន​មនុស្សច្រើនជាង ៤០នាក់បាត់បង់ជីវិត​ ព្រមទាំងតំបន់មួយ​ចំនួនទៀតរួមមានខេត្ត អូកាយ៉ាម៉ា, អ៊ីហ៊ីមី, ក្យូតូ, យ៉ាម៉ាហ្គូជី, ហ្វូគូកា,ខាហ្គូស៊ីម៉ា, ក្យូហ្គោ, ស្ស៊ីហ្គា, ជីហ្វូ,កូជី, និងសាហ្គា។

លើសពីនេះទៅទៀត បើតាមអ្នកនាំពាក្យរដ្ឋាភិបាល ជប៉ុន លោក យ៉ូស៊ីហ៊ីដេ ស៊ូហ្គា (Yoshihide Suga) ដោយសារតែគ្រោះធម្មជាតិនេះ លោកនាយករដ្ឋមន្ត្រី ស៊ីនហ្សូ អាបេ បានលុបចោលដំណើរ​ទស្សនកិច្ចទៅ​កាន់ប្រទេសប៊ែលហ្សិក បារាំង អារ៉ាប៊ីសាអូឌីត និងអេហ្ស៊ីប ដែលដំបូងឡើយគ្រោងនឹងធ្វើឡើងនៅថ្ងៃពុធស្អែកនេះ។

ដោយឡែក សេចក្តីបង្គាប់ឲ្យជម្លៀសខ្លួន ក៏ត្រូវដាក់ចេញសម្រាប់ប្រជាជនជប៉ុនជិត ០៦លាននាក់ទៀត នៅតាមខេត្តចំនួន ១៩ ផងដែរ។ ប៉ុន្តែ អាជ្ញាធរជប៉ុន មិនទាន់វាយតម្លៃ​ពីការខូចខាតទំហំសេដ្ឋកិច្ច​នៅឡើយទេ ដោយគ្រាន់តែឱ្យដឹង​ថា ការបំផិ្លចបំផ្លាញដោយគ្រោះធម្មជាតិ​ ដ៏អាក្រក់អស់រយៈពេល​ជាង ៤ថ្ងៃមកនេះ មានសភាពធ្ងន់ធ្ងរ ស្របពេលផ្ទះ ១១,២០០ខ្នង គ្មានអគ្គីសនីប្រើប្រាស់ និងរាប់សិបខ្នង​ទៀតគ្មានទឹកស្អាតប្រើប្រាស់៕