(តូក្យូ)៖ ប្រព័ន្ធផ្សព្វផ្សាយជប៉ុននៅថ្ងៃអង្គារនេះ បានរាយការណ៍ថា បុរសម្នាក់បានចាក់សម្លាប់ប៉ូលិសម្នាក់ ហើយបានដណ្ដើមកាំភ្លើង ប៉ូលិសបាញ់សម្លាប់បុរសម្នាក់ផ្សេងទៀត នៅក្នុងទីក្រុង តូយ៉ាម៉ា (Toyama) ភាគកណ្ដាលប្រទេសជប៉ុន។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅល្ងាចថ្ងៃអង្គារ ទី២៦ ខែមិថុនា ឆ្នាំ២០១៨។
ប្រព័ន្ធផ្សព្វផ្សាយជប៉ុន តាមរយៈការស្រង់សម្ដីពីអាជ្ញាធរនៅក្នុងតំបន់បានបញ្ជាក់ទៀតថា បន្ទាប់ពីចាក់សម្លាប់ប៉ូលិសម្នាក់ ជនដៃដល់ បានបាញ់សម្លាប់បុរសម្នាក់ទៀតនៅក្បែរនោះ ជាមួយកាំភ្លើងដែលរូបគេដណើ្ដមពីប៉ូលិស។ ប៉ុន្តែទន្ទឹមគ្នាជនសង្ស័យរូបនេះ ក៏ត្រូវបាន ប៉ូលិសដទៃនៅក្នុងហេតុការណ៍នោះបាញ់ឱ្យរបួសធ្ងន់ ខណៈអ្នកនាំពាក្យរដ្ឋាភិបាលជប៉ុន លោក យ៉ូស៊ីហ៊ីដេ ស៊ូហ្គា (Yoshihide Suga) ក៏បានទទួល ស្គាល់ដែរថា មនុស្សពីរនាក់ត្រូវបានសម្លាប់។
គួរបញ្ជាក់ថា បើតាមអាជ្ញាធរជប៉ុន ជនរងគ្រោះទាំងពីរនាក់នោះ គឺជាប៉ូលិសម្នាក់ដែលត្រូវចាក់សម្លាប់ និងឆ្មាំយាមម្នាក់ដែលត្រូវជនសង្ស័យបាញ់សម្លាប់ នៅក្បែរសាលារៀនមួយកន្លែងនៅក្នុងតំបន់។ ដោយឡែកដើមចមដែលឈានទៅដល់ការបង្ករឿងនេះឡើង គឺកំពុងស្ថិតនៅក្នុងការស៊ើបអង្កេតនៅឡើយ៕
