(ស៊ីដនី)៖ អ្នកវិទ្យាសាស្រ្តវ័យចំណាស់បំផុតនៃប្រទេសអូស្រ្តាលី គឺបរិស្ថានវិទូលោក ដេវីដ ហ្គោដល (David Goodall) កំពុងធ្វើដំណើរទៅកាន់ប្រទេសស្វីស ក្នុងគោលបំណងបញ្ចប់ជីវិតជាង ១០០ឆ្នាំរបស់ខ្លួន ដែលកាន់តែបាត់បង់អត្ថន័យទៅៗ ហើយប្រទេសកំណើតរបស់លោកផ្ទាល់ មិនគាំទ្រការបញ្ចប់ជីវិតដោយស្ម័គ្រចិត្តបែបនេះ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅរសៀលថ្ងៃព្រហស្បតិ៍ ទី០៣ ខែឧសភា ឆ្នាំ២០១៨។
លោកតា Goodall បានចាកចេញពីទីក្រុង Perth រដ្ឋអូស្រ្តាលីខាងលិចនាថ្ងៃពុធនេះ ក្រោយពីបានផ្តាំលាកូន ចៅ និងចៅទួតរបស់លោក នៅឯព្រលានយន្តហោះ។ លោកតា David Goodall គឺជាអ្នកគាំទ្រម្នាក់ចំពោះមធ្យោបាយ នៃការបញ្ចប់ជីវិតដោយស្ម័គ្រចិត្ត ក្នុងអំឡុងពេលជាច្រើនឆ្នាំកន្លងទៅនេះ ហើយលោកតាក៏បានបង្ហាញការសោកស្តាយផងដែរ ដែលពុំអាចបញ្ចប់ជីវិតតាមចិត្តប៉ងបាន នៅក្នុងប្រទេសកំណើតរបស់ខ្លួន ដោយត្រូវធ្វើដំណើរទៅប្រទេសដទៃ ដើម្បីធ្វើយ៉ាងដូច្នោះ។
គួរជម្រាបថា បើតាមការអះអាងពីលោកតា Goodall ដោយសារតែបញ្ហាលំបាកនាឆ្នាំកន្លងទៅ វាបានជំរុញឲ្យលោកសម្រេចចិត្តធ្វើបែបនេះ៕
