​(ប៉េកាំង)៖ អ្នកនាំពាក្យ​ក្រសួងការពារ​ជាតិចិន លោក វូ កៀន (Wu Qian) នៅថ្ងៃព្រហស្បតិ៍នេះ​បាន​និយាយថា មីស៊ីល​ផ្លោង Dongfeng-26 ត្រូវបាន​ប្រគល់ឱ្យកង​កម្លាំងគ្រាប់រ៉ុក្កែត​ នៃកងទ័ព​រំដោះប្រជាជនចិន​ហើយ។ នេះបើតាម​ការចេញផ្សាយ​ដោយ ទីភ្នាក់ងារសារព័ត៌មាន​ចិន ស៊ីនហួរ នៅល្ងាចថ្ងៃព្រហស្បតិ៍ ទី២៦ ខែមេសា ឆ្នាំ២០១៨។

ថ្លែងនៅក្នុងសន្និសីទ​សារព័ត៌មាន លោក Wu Qian បានគូស​បញ្ជាក់យ៉ាងដូច្នេះថា «មីស៊ីលរយៈចំងាយ​មធ្យម និងឆ្ងាយថ្មីនេះ ត្រូវបាន ផលិតឡើង​ទាំងស្រុងដោយ​ជនជាតិចិន ហើយវានឹងត្រូវ​ដាក់ឱ្យបម្រើការ​ នៅក្នុងប្រតិបត្តិការវាយប្រហារ​រយៈចំងាយ​ខ្លី និងកំណត់ គោលដៅច្បាស់លាស់​ប្រឆាំងនឹងគោលដៅ​សត្រូវ​ទាំងនៅលើគោក និងនាវាចម្បាំង​មាន​ទំហំធំ ឬមធ្យមជាដើម។

«ចិនមិនបានផ្លាស់​ប្ដូរយុទ្ធសាស្ត្រ​នុយក្លេអ៊ែរ ឬគោល​នយោបាយមិនប្រើប្រាស់​នុយក្លេអ៊ែរ​មុនរបស់ខ្លួន​ឡើយ»។ នេះគឺជាការគូស បញ្ជាក់​របស់​លោក Wu Qian៕