(វ៉ាស៊ីនតោន)៖ អាជ្ញាធរអាមេរិក ទីបំផុតបានបញ្ជាក់ថា អ្នកដំណើរម្នាក់ដែលបានទទួលរងរបួស ក្នុងហេតុការណ៍ យន្តហោះដឹកអ្នកដំណើរមួយគ្រឿងរបស់ក្រុមហ៊ុនអាកាសចរណ៍ Southwest Airlines បានចុះចតជាបន្ទាន់នៅអាកាសយានដ្ឋានអន្តរជាតិនៃទីក្រុង ហ្វីឡាឌែឡព្យ៉ា (Philadelphia) ក្រោយពីផ្ទុះឆេះម៉ាស៊ីនមួយចំហៀងនោះ បានទទួលមរណភាពទៅហើយ ក្នុងស្ថានភាពមួយដ៏គួរឲ្យតក់ស្លុតបំផុត។ នេះបើតាមការចេញផ្សាយដោយសារព័ត៌មាន New York Times នៅរសៀលថ្ងៃពុធ ទី១៨ ខែមេសា ឆ្នាំ២០១៨។
ជនរងគ្រោះខាងលើមានឈ្មោះថា ចែននីហ្វឺ រីយ៉ូដេន (Jennifer Riordan) ដែលជាប្រធានផ្នែករបស់ធនាធារមួយកន្លែង នៅសហរដ្ឋអាមេរិក និងជាម្តាយរបស់កូនចំនួនពីរនាក់ រស់នៅរដ្ឋ New Mexico។ បើតាមសាក្សីជាអ្នកដំណើរលើយន្តហោះជាមួយគ្នា «លោកស្រី Riordan បានទទួលរងរបួសធ្ងន់ធ្ងរ ដោយសារត្រូវកម្លាំងសម្ពាធខ្យល់ ស្រូបទាញពាក់កណ្តាលខ្លួនលោកស្រី ចេញទៅក្រៅតាមបង្អួចយន្តហោះ ដែលត្រូវបានបែកដោយសារតែកម្ទេចកម្ទីរម៉ាស៊ីនយន្តហោះដែលបានផ្ទុះ»។ ភ្លាមៗនោះ អ្នកដំណើរដែលអង្គុយនៅជាប់នោះ និងអ្នកឯទៀតៗ ក៏បានស្រវ៉ាមកចាប់លោកស្រីជាប់ ហើយទាញខ្លួនលោកស្រី Riordan ចូលមកក្នុងយន្តហោះវិញ។
គួរជម្រាបថា ក្រោយពីយន្តហោះខាងលើដែលជាប្រភេទយន្តហោះ Boeing 737-700 ផ្ទុកអ្នកដំណើរ ១៤៣នាក់ និងសហសេវិក ០៥នាក់ បានធ្វើការចុះចតយ៉ាងទាន់ហន់ នៅអាកាសយានដ្ឋានទីក្រុង Philadelphia លោកស្រី Riordan ក៏ត្រូវបានគេរួសរាន់បញ្ជូនទៅកាន់មន្ទីរពេទ្យយ៉ាងញាប់ដៃញាប់ជើងជាទីបំផុត ប៉ុន្តែក្រោយមកដោយសារតែរបួសលោកស្រីមានសភាពធ្ងន់ធ្ងរពេក ទើបក្រុមគ្រូពេទ្យមិនអាចជួយសង្រ្គោះជីវិតលោកស្រី បានទាន់ពេលវេលាឡើយ៕
