(ទ្រីប៉ូលី)៖ កងកម្លាំងឆ្មាំសមុទ្រលីប៊ីនៅថ្ងៃអង្គារសប្ដាហ៍នេះ បានជួយសង្រ្គោះក្រុមជនអន្តោប្រវេសន៍ខុសច្បាប់ ច្រើនជាង ២០០នាក់ នៅលើទូកពោងកៅស៊ូពីរគ្រឿង នៅឯឆ្នេរភាគខាងលិចនៃប្រទេស។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃពុធ ទី១៨ ខែមេសា ឆ្នាំ២០១៨។
ថ្លែងប្រាប់ស៊ីនហួរ មន្ត្រីនៃនាយកដ្ឋានប្រឆាំងអន្តោប្រវេសន៍ខុសច្បាប់ប្រចាំទីក្រុងទ្រីប៉ូលី បានឱ្យដឹងយ៉ាងដូច្នេះថា «នាយកដ្ឋានប្រឆាំងសកម្មភាពអន្តោប្រវេសន៍ខុសច្បាប់ បានទទួលជនអន្តោប្រវេសន៍ខុសច្បាប់ជាង ២០៤នាក់ មកពីប្រទេសក្នុងតំបន់អាហ្វ្រិកចំនួន ០៩ផ្សេងៗពីគ្នា ក្នុងនោះរួមមានស្ត្រី ៧១នាក់ និងកុមារ ១០នាក់ បន្ទាប់ពីពួកគេត្រូវបានជួយសង្រ្គោះ ដោយឆ្មាំសមុទ្រលីប៊ី និងបាននាំពួកគេទៅកាន់ទីក្រុងទ្រីប៉ូលី»។
គួរជម្រាបថា លីប៊ីបានក្លាយជាកន្លែងចាកចេញដ៏សំខាន់ របស់ជនអន្តោប្រវេសន៍ឆ្ពោះទៅកាន់ទ្វីបអឺរ៉ុប ហើយការភៀសខ្លួនរបស់ពួកនេះទៀតសោត ធ្វើឡើងដើម្បីគេចចេញពីភាពចលាចល និងអសន្តិសុខនៅក្នុងប្រទេសរបស់ពួកគេ ក្នុងក្ដីសង្ឃឹមថា អាចនឹងសាងជីវិតថ្មីនៅលើដីអឺរ៉ុប។ ដោយឡែក បើតាមក្រុមមន្ត្រីលីប៊ី ជនអន្តោប្រវេសន៍ត្រូវបានជួយសង្រ្គោះ ដោយឆ្មំាសមុទ្រលីប៊ីក្នុងត្រីមាស ដំបូងឆ្នាំ២០១៨នេះមានចំនួនជាង ៤,០០០នាក់៕
