(យូអិន)៖ អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គួទែរ៉ែស (Antonio Guterres) មានការសោកស្ដាយជាខ្លាំង ចំពោះការលើកឡើងរបស់ប្រមុខយោធាមីយ៉ាន់ម៉ា លោក យូ មីន អ៊ុង ហ្លេង (U Min Aung Hlaing) ពាក់ព័ន្ធនឹងជនជាតិរ៉ូហ៊ីងយ៉ា។ នេះបើតាមអ្នកនាំពាក្យរបស់ លោក Guterres ដកស្រង់ដោយ ទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃអង្គារ ទី២៧ ខែមីនា ឆ្នាំ២០១៨។
ថ្លែងនៅក្នុងសេចក្ដីថ្លែងការណ៍ ចេញផ្សាយកាលពីថ្ងៃចន្ទ អ្នកនាំពាក្យលោក Guterres គឺលោក ហ្វារ៉ាន ហាក (Farhan Haq) បានគូសបញ្ជាក់ដូច្នេះថា «លោកអគ្គលេខាធិការអង្គការសហប្រជាជាតិមានការសោកស្ដាយ ចំពោះការលើកឡើងរបស់ប្រមុខយោធាមីយ៉ាន់ម៉ា លោក U Min Aung Hlaing ពាក់ព័ន្ធនឹងជនជាតិរ៉ូហ៊ីងយ៉ា»។
ប្រតិកម្មរបស់លោក Guterres ធ្វើឡើងបន្ទាប់ពីលោក Aung Hlaing កាលពីថ្ងៃចន្ទ នៅអំឡុងពិធីជួបជុំមួយនៅឯភាគខាងជើងរដ្ឋ Kachin បាននិយាយថា «ជនជាតិដើមភាគតិចរ៉ូហ៊ីងយ៉ា គឺជាជនជាតិ Bengalis» ហើយថា «ពួកគេគ្មានគុណសម្បតិ្ត ឬវប្បធម៌រួមជាមួយជនជាតិដទៃទៀត ក្នុងប្រទេសមីយ៉ាន់ម៉ានោះទេ»។
បន្ថែមពីលើនេះ នៅក្នុងសេចក្ដីថ្លែងការណ៍នោះដែរ លោកអគ្គលេខាធិការអង្គការសហប្រជាជាតិ ក៏បានបញ្ជាក់ផងដែរពីសារៈសំខាន់ នៃការទទួលខុសត្រូវរបស់រដ្ឋាភិបាលមីយ៉ាន់ម៉ា ក្នុងការផ្ដល់ជំនួយ និងការពារសន្តិសុខ ដល់អ្នកដែលត្រូវការជាចាំបាច់ ក៏ដូចជាធានាផងដែរសម្រាប់ជនជាតិរ៉ូហ៊ីងយ៉ា ដើម្បីឱ្យពួកគេត្រឡប់មកផ្ទះសម្បែងរបស់ពួកគេវិញ ដោយស្ម័គ្រចិត្ត សុវត្ថិភាព និងភាពថ្លៃថ្នូរ។
គួរបញ្ជាក់ថា អំពើហិង្សារវាងក្រុមប្រដាប់អាវុធរ៉ូហ៊ីងយ៉ា និងយោធាមីយ៉ាន់ម៉ា កាលពីថ្ងៃទី២៥ ខែសីហា ឆ្នាំ២០១៧ នៅក្នុងរដ្ឋ Rakhine នៃភាគខាងជើងប្រទេសមីយ៉ាន់ម៉ា បានផ្ដាច់យកអាយុជីវិតមនុស្សរាប់រយនាក់ ខណៈមនុស្សប្រមាណជា ៦៨៨,០០០នាក់ បានរត់ភៀសខ្លួនទៅកាន់ប្រទេសបង់ក្លាដែស៕
