(កាប៊ុល)៖ ការវាយប្រហាររបស់ក្រុមសកម្មយុទ្ធទាំងព្រឹកព្រលឹម នៅថ្ងៃចន្ទនេះ លើមូលដ្ឋានទ័ពអាហ្វហ្គានីស្ថានមួយកន្លែង ស្ថិតនៅភាគខាងលិចនៃរដ្ឋធានីកាប៊ុល បានបញ្ចប់ហើយ ដោយបន្សល់ទុកមនុស្ស ០៥នាក់ បាត់បង់ជីវិត ក្នុងនោះរួមមានទាំងកងកម្លាំងសន្តិសុខអាហ្វហា្គនីស្ថាន ០២នាក់ និងក្រុមសកម្មប្រយុទ្ធ ០៣នាក់ ខណៈកងកម្លាំងសន្តិសុខ១០នាក់ ទៀតរងរបួស។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅរសៀលថ្ងៃចន្ទ ទី២៩ ខែមករា ឆ្នាំ២០១៨។
ថ្លែងនៅក្នុងសេចក្ដីថ្លែងការណ៍របស់ខ្លួន ក្រសួងការពារជាតិអាហ្វហ្គានីស្ថាន បានឱ្យដឹងថា ក្រុមសកម្មប្រយុទ្ធមានគ្នា ០៥នាក់ បានវាយឆ្មក់លើកងសេនាតូចមួយ នៃកងពលធំលេខ១១១ នៅក្នុងតំបន់ Charrah-i-Qambar ស្ថិតនៅក្នុងកងអង្គភាពប៉ូលិសទី ៥ នៃរដ្ឋធានីកាប៊ុល នៅម៉ោង ០៥៖០០នាទីព្រឹក (ម៉ោងនៅក្នុងតំបន់)។ ការវាយប្រយុទ្ធគ្នា បានចាយពេលអស់ជាច្រើនម៉ោង ទម្រាំតែកងកម្លាំងសន្តិសុខ អាចគ្រប់គ្រងស្ថានការណ៍ បានឡើងវិញទាំងស្រុង។ ប៉ុន្តែព្រមពេលជាមួយគ្នា ក្រសួងការពារជាតិក៏បានទទួលស្គាល់ដែរថា កងកម្លាំងសន្តិសុខរបស់ខ្លួន ០២នាក់បានស្លាប់ និង ១០នាក់ទៀតរងរបួស។
គួរបញ្ជាក់ថា ក្រសួងការពារជាតិអាហ្វហ្គានីស្ថាន បានទាត់ចោលសេចក្ដីរាយការណ៍ដែល ពួកសកម្មប្រយុទ្ធបានវាយប្រហារលើសាកលវិទ្យាល័យការពារជាតិ Marshal Fahim National Defense University ហើយថា ការពិតពួកសកម្មប្រយុទ្ធមានគោលដៅលើ កងសេនាតូចមួយ នៃកងពលធំ លេខ ១១១។ បន្ថែមពីលើនេះពួក ISIS ត្រូវបានគេរាយការណ៍ ថាអ្នកនៅពីក្រោយការវាយប្រហារនេះ ដែលកើតឡើងតែជាងពីរថ្ងៃប៉ុណ្ណោះ បន្ទាប់ពីការវាយប្រហារ ដោយបំផ្ទុះគ្រាប់បែកអត្តឃាតរបស់ពួកតាលបង់ បានផ្ដាច់យកអាយុជីវិតមនុស្ស ១០៣នាក់ និង ២៣៥នាក់ ទៀតរងរបួសកាលពីថ្ងៃសៅរ៍សប្តាហ៍មុន៕
http://img1-azcdn.newser.com/getimage.aspx?docid=197577b31d1443cda3855b74bb631c2c&source=a&width=654&height=999999&crop=n
