(ប៉េកាំង)៖ អ្នកនាំពាក្យក្រសួងការបរទេសចិន នៅថ្ងៃសៅរ៍នេះបាននិយាយថា ទីក្រុងប៉េកាំង នឹងចាត់វិធានការចំាបាច់នានា ដើម្បីការពារដែនអធិបតេយ្យភាពរបស់ខ្លួន បន្ទាប់ពីនាវា ចម្បាំងអាមេរិកមួយគ្រឿង បានចូលក្នុងដែនទឹកនៅក្បែរបរិវេណកោះ Huangyan ក្នុងសមុទ្រចិនខាងត្បូង។ នេះបើតាមការចេញផ្សាយដោយ ទីភ្នាក់ងារសារព័ត៌មានចិនស៊ីនហួរ នៅរសៀលថ្ងៃសៅរ៍ ទី២០ ខែមករា ឆ្នាំ២០១៨។
នៅពេលឆ្លើយនឹងសំណួរអ្នកសារព័ត៌មាន អ្នកនាំពាក្យលោក លូ កាង បានទទួលស្គាល់ថា នាវាពិឃាតបំពាក់មីស៊ីលអាមេរិក USS Hopper បានធ្វើដំណើរមកក្បែរចំងាយ ២២ គីឡូម៉ែត្រពីកោះ Huangyan កាលពីល្ងាចថ្ងៃពុធ ដោយគ្មានការអនុញ្ញាតពីរដ្ឋាភិបាលចិន។ លោក លូ បន្ថែមទៀតថា ការធ្វើសកម្មភាពច្រំដែលបែបនេះរបស់សហរដ្ឋអាមេរិក បានបង្កផលប៉ះពាល់ដល់ផលប្រយោជន៍សន្តិសុខ និងដែនអធិបតេយ្យភាពចិន ក៏ដូចជាគំរាមកំហែងដល់នាវា និងបុគ្គលិកចិន ដែលកំពុងធ្វើការនៅក្នុងតំបន់ផងដែរ។ យ៉ាងណាក៏ដោយ អ្នកនាំពាក្យក្រសួងការបរទេសចិនរូបនេះបានព្រមានថា ចិននឹងចាត់រាល់វិធានការចំាបាច់ទាំងអស់ ដើម្បីការពារដែនអធិបតេយ្យរបស់ចិន។
គួរបញ្ជាក់ថា បើតាមលោក លូ កាង កងនាវាចិនបានព្រមានឱ្យនាវាពិឃាត USS Hoppe ធ្វើដំណើរចេញឱ្យឆ្ងាយពីដែនទឹកចិន។ ចំណែកឯទីក្រុងវ៉ាស៊ីនតោន មិនទាន់ធ្វើការអត្ថាធិប្បាយអ្វីនៅឡើយទេ ប៉ុន្តែរឿងបែបនេះមិនមែនទើបតែកើតឡើងជាលើកទីមួយនោះឡើយ៕
