(កៀវ)៖ តុលាការក្នុងទីក្រុងកៀវនាដើមសប្តាហ៍នេះ បានទាត់ចោលសំណើរបស់អគ្គរដ្ឋអាជ្ញាអ៊ុយក្រែន ក្នុងការដាក់អតីតប្រធានាធិបតីហ្សកហ្ស៊ី លោក មីឃែល សាកាសវីលី (Mikheil Saakashvili) ដែលបច្ចុប្បន្នជាមេដឹកនាំគណបក្សនយោបាយមួយ របស់ប្រទេសអឺរ៉ុបខាងកើតមួយនេះ ឲ្យស្ថិតក្រោមការឃុំឃាំងក្នុងផ្ទះ និងបានសម្រេចដោះលែងរូបលោក ឲ្យមានសេរីភាពវិញ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅរសៀលថ្ងៃអង្គារ ទី១២ ខែធ្នូ ឆ្នាំ២០១៧។
លោក Saakashvili បច្ចុប្បន្នជាថ្នាក់ដឹកនាំមួយរូប នៃគណបក្សនយោបាយអ៊ុយក្រែនមានឈ្មោះថា «ចលនាកម្លាំងថ្មី» បានដើរចាកចេញពីតុលាការ ដោយមានការចោមរោម ពីសំណាក់ក្រុមអ្នកគាំទ្ររបស់លោក។ បន្ទាប់ពីបានច្រានចោលសំណើរបស់អគ្គរដ្ឋអាជ្ញាអ៊ុយក្រែន ក្នុងការឃុំឃាំង លោក Saakashvili នៅក្នុងផ្ទះរហូតដល់ពេលត្រូវឡើងតុលាការនោះ ចៅក្រម ឈ្មោះ ឡារីសា ត្សូកូល (Larysa Tsokol) បានលើកឡើងថា សេចក្តីសម្រេចរបស់តុលាការ អាចត្រូវប្តឹងជំទាស់ពីសំណាក់ក្រុមរដ្ឋអាជ្ញាបាន ក្នុងអំឡុងពេល ០៥ថ្ងៃបន្ទាប់។
គួរជម្រាបថា លោក Saakashvili ត្រូវបានគេឃាត់ខ្លួនកាលពីថ្ងៃទី០៨ ខែធ្នូ ក្រោមការចោទប្រកាន់ថា មានពាក់ព័ន្ធនឹងសមាជិកនៃក្រុមឧក្រិដ្ឋជន ហើយជួយបិទបាំងសកម្មភាពឧក្រិដ្ឋកម្មរបស់ពួកគេ។ ប្រធានាធិបតីអ៊ុយក្រែន លោក ផេត្រូ ផរ៉ូហ្សេនកូ (Petro Poroshenko) បានបញ្ជាក់ថា បណ្តឹងចោទប្រកាន់ទៅលើ លោក Saakashvili គឺពុំមានជាប់ពាក់ព័ន្ធនឹងសកម្មភាពនយោបាយរបស់អតីតមេដឹកនាំហ្សកហ្ស៊ីរូបនេះឡើយ៕
