(តូក្យូ)៖ រដ្ឋមន្រ្តីការពារជាតិជប៉ុន លោក អ៊ីតស៊ូណូរី ណូដេរា (Itsunori Onodera) បានគូសបញ្ជាក់ថា មីស៊ីលផ្លោង ដែលកូរ៉េខាងជើង បានបាញ់សាកល្បង​រំលងពី​លើ​​ប្រទេស​របស់លោក កាលពីព្រឹកមិញនេះ អាចរត់ដល់កោះហ្គាំ (Guam) ដែលជាទឹកដីរបស់សហរដ្ឋអាមេរិកបានយ៉ាងងាយ ដោយសម្អាងថាវាមានរយៈចម្ងាយ​ដល់ទៅ៥,០០០គីឡូម៉ែត្រឯណោះ។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅល្ងាចថ្ងៃអង្គារ ទី២៩ ខែសីហា ឆ្នាំ២០១៧។

លោក Onodera បានឲ្យដឹងថា ប្រភេទរបស់មីស៊ីលដែលត្រូវបានបាញ់ដោយទីក្រុងព្យុងយ៉ាង កាលពីព្រឹកថ្ងៃអង្គារនេះ បានសក្តានុពលដែលអាចហោះបានឆ្ងាយរហូតដល់កោះហ្គាំរបស់ សហរដ្ឋអាមេរិក ដែលស្ថិតនៅភាគខាងលិចមហាសមុទ្រប៉ាស៊ីហ្វិក ដោយសារចម្ងាយរត់របស់មីស៊ីលនេះ អាចដល់៥,០០០គីឡូម៉ែត្រ ដូច្នេះហើយ​វាជាក់ច្បាស់ណាស់ថា វាគឺជាប្រភេទ មីស៊ីលដែលអាចរត់ដល់កោះហ្គាំ។ នាព្រឹកថ្ងៃអង្គារនេះ កូរ៉េខាងជើងបានបាញ់សាកល្បងមីស៊ីលផ្លោងចំនួន០១គ្រាប់ ដែលបានហោះរំលងប្រទេសជប៉ុន មុនធ្លាក់ចូលទៅក្នុងមហាសាគរ ប៉ាស៊ីហ្វិក​​​នៅចម្ងាយ១,១៨០គីឡូម៉ែត្រ ភាគខាងកើតកោះហុកកៃដូ (Hokkaido) បន្ទាប់ពីវាត្រូវបានបាញ់ចេញពីរដ្ឋធានីព្យុងយ៉ាង កាលពីវេលាម៉ោង៥៖៥៧នាទីព្រឹកថ្ងៃនេះ (ម៉ោងក្នុងទីក្រុងព្យុងយ៉ាងផ្ទាល់) ហើយធ្វើដំណើរបានជាង២,៧០០គីឡូម៉ែត្រ។

គួរបញ្ជាក់ថា បើតាមកងទ័ពជប៉ុនក៏ដូចជាកងទ័ពកូរ៉េខាងត្បូង មីស៊ីលកូរ៉េ​ខាងជើងដែលទើបសាកល្បងមួយគ្រាប់នេះ ទំនងជាប្រភេទ Hawsong-12 ដែលមាន​រយៈ​ចម្ងាយចន្លោះពី៣,៧០០គីឡូម៉ែត្រដល់៦,០០០គីឡូម៉ែត្រ ខណៈកោះហ្គាំរបស់សហរដ្ឋអាមេរិក ស្ថិតនៅចម្ងាយតែ៣,៤៣០គីឡូម៉ែត្រប៉ុណ្ណោះ ពីប្រទេស​កូរ៉េ​ខាង​ជើង៕