(ប៉ូឡូញ)៖ ប្រធានាធិបតីអាមេរិក លោក​ ដូណាល់ ត្រាំ បានធ្វើដំណើរទៅដល់ប្រទេសប៉ូឡូញហើយ មុននឹងលោក​ត្រូវថ្លែងសារ​ទៅកាន់ក្រុមមនុស្សម្នា នៅខាងក្រៅរដ្ឋធានី Warsaw និងចូល រួមកិច្ចប្រជុំស្ដីពី​ថាមពលជាមួយ​មេដឹកនាំ​អឺរ៉ុប។ នេះបើតាមការ​ចេញផ្សាយដោយ​សារព័ត៌មាន Daily Mail នៅព្រឹកថ្ងៃព្រហស្បតិ៍ ទី០៦ ខែកក្កដា ឆ្នាំ២០១៧។

យន្ដហោះ Air Force One របស់លោក ដូណាល់ ត្រាំ បានចុះចត​នៅឯ​អាកាសយានដ្ឋាន ទីក្រុង Warsaw កាលពីយប់​ថ្ងៃពុធ នាឱកាសបំពេញ​ដំណើរទស្សកិច្ច​ជាលើកដំបូង ទៅកាន់​ប្រទេសប៉ូឡូញ និងអាល្លឺម៉ង់ ជាទីដែលលោក​នឹងត្រូវចូលរួម​កិច្ចប្រជុំ G20 ជាមួយបណ្ដាមេដឹកនាំ​ពិភពលោក ក្រោមការរំពឹងទុក្ខថា នឹងត្រូវបានទទួលស្វាគមន៍​យ៉ាងកក់ក្ដៅ បើទោះជាអឺរ៉ុប​កំពុងអាក់អន់ចិត្ត​នឹងប្រធានាធិបតី​អាមេរិករូបនេះ​ក៏ដោយ។

គួរបញ្ជាក់ថា លោក ដូណាល់ ត្រាំ នឹងថ្លែងសារ​ទៅកាន់ហ្វូងមនុស្ស​នៅថ្ងៃព្រហស្បតិ៍នេះ នៅឯទីលាន Krasinski Square បន្ទាប់មកត្រូវ​ជួបពិភាក្សាការងារជាមួយប្រធានាធិបតី​ប៉ូឡូញ និងក្រូអាត​ ព្រមទំាងចូលរួម​កិច្ចប្រជុំស្ដីពី​វិស័យថាមពល​ ជាមួយមេដឹកនាំអឺរ៉ុបផងដែរ មុននឹងហោះ​ទៅកាន់​ទីក្រុង Hamberg ប្រទេសអាល្លឺម៉ង់ ដើម្បីចូលរួមកិច្ច​ប្រជុំ G20 នៅថ្ងៃសុក្រស្អែក​នេះ៕