(ម៉ានីល)៖ ចំនួនសាកសពដែលរកឃើញ បានកើនឡើងដល់ ៣៦នាក់ហើយ​រួមទាំងខ្មាន់កាំភ្លើង​ម្នាក់ផងដែរ បន្ទាប់ពីសណ្ឋាគារ-កាស៊ីណូមួយកន្លែង​នៅក្នុងរដ្ឋធានីម៉ានីល នៃប្រទេសហ្វីលីពីន ត្រូវបានជនប្រដាប់អាវុធ​រូបនេះ បង្កជាអគ្គីភ័យឆាបឆេះឡើង នាំឲ្យមនុស្សជាច្រើនត្រូវរលាកភ្លើង និងថប់ដង្ហើមស្លាប់ ខណៈពីដំបូងមានការចេញផ្សាយថា មានជនប្រដាប់អាវុធមួយចំនួននៅទីនោះ ហើយបានកើត​មានការបាញ់បោះថែមទៀត។ នេះបើតាម​ទីភ្នាក់ងារព័ត៌មានចិន ស៊ិនហួរ នៅរសៀលថ្ងៃសុក្រ ទី០២ ខែឧសភា ឆ្នាំ២០១៧។

ខ្មាន់កាំភ្លើងខាងលើ​ ដែលបានបង្កអគ្គីភ័យតែម្នាក់ឯងគត់នោះ បានសម្រុកចូលទៅ​ក្នុងសណ្ឋាគារ-កាស៊ីណូ Resorts World Manila និងធ្វើការ​បាញ់​បោះយ៉ាងកម្រោល ហើយចាក់សាំងដុតបំផ្លាញ​សម្ភារៈផ្សេងៗ​នៅក្នុងនោះ រួមទាំងខ្លួន​ឯងតែម្តង។ ជុំវិញហេតុការណ៍នេះ ក្រុមមន្រ្តីប៉ូលិសហ្វីលី​ពីន​បានជឿជាក់ថា វាពុំមែនជាអំពើភេរវកម្ម​ ដែលមានជាប់ពាក់ព័ន្ធ​នឹងក្រុមបណ្តាញ ISIS នៅក្នុងប្រទេសឡើយ និងបានអះអាងថា វាគឺជាករណីប្លន់​ស្ទើរ​ភ្លើង​មួយ ដែលប្រព្រឹត្ត​ដោយបុរសមិនគ្រប់​សតិម្នាក់។ យោងតាមការ​ត្រួតពិនិត្យសាកសព​របស់ជនដៃដល់ ជននោះបានដុតខ្លួនឯង​ហើយបាញ់​សម្លាប់ខ្លួន​។

ម៉្យាងវិញទៀត ក្នុងចំណោមសាកសពជនរងគ្រោះដែលបានបាត់បង់ជីវិត ពុំមាននរណាម្នាក់​ទទួលរងស្នាមគ្រប់​កាំភ្លើងនោះដែរ ហើយប៉ូលិសបាន​បន្ថែមថា ពួកគេទំនងជា​បានស្លាប់ដោយសារ​ថប់ខ្យល់ដកដង្ហើម ពីព្រោះតែ​ផ្សែងអគ្គីភ័យ​យ៉ាងសន្ធោសន្ធៅ។ ហេតុការណ៍​ដ៏អាក្រក់នេះ ក៏បានបន្យល់​ទុកមនុស្ស​ប្រមាណ ៥៤នាក់ផ្សេងទៀតរបួសស្រាលផងដែរ។

គួរបញ្ជាក់ថា ស្របពេលជាមួយគ្នានេះ​កងទ័ពហ្វីលីពីន​បាន និងកំពុងតែធ្វើការប្រយុទ្ធ​ខ្លាំងក្លា ដើម្បី​កម្ចាត់ក្រុមឧទ្ទាមគាំទ្រ ISIS នៅក្នុងទីក្រុង Marawi នៃកោះ Mindanao ដែលសង្រ្គាមដ៏កក្រើកនេះ បានបណ្តាល​ឲ្យទាំងពលទាហាន ជនស៊ីវិល និងក្រុមសកម្ម​ប្រយុទ្ធសរុបរាប់រយ​នាក់ស្លាប់៕