(ហ្សាការតា)៖ ប៉ូលិសឥណ្ឌូណេស៊ីនៅថ្ងៃសុក្រនេះ បានធ្វើការចាប់ឃាត់ខ្លួនមនុស្សចំនួនបីនាក់ ក្រោមបទសង្ស័យថាអាចមានជាប់ពាក់ព័ន្ធនឹង ករណីវាយប្រហារដោយបំផ្ទុះគ្រាប់បែកអត្តឃាតរបស់ក្រុមភេរវករ ISIS កាលពីថ្ងៃពុធសប្តាហ៍នេះ ដែលបានផ្តាច់យកជីវិតមន្រ្តីប៉ូលិសឥណ្ឌូណេស៊ីចំនួនបីរូប និងបានបណ្តាលឲ្យមនុស្សប្រមាណជា១២នាក់ផ្សេងទៀត ទទួលរងរបួសធ្ងន់ស្រាលនៅឯរដ្ឋធានីហ្សាការតា។ នេះបើតាមការចេញផ្សាយដោយសារព័ត៌មាន Channel News Asia នៅយប់ថ្ងៃសុក្រ ទី២៦ ខែឧសភា ឆ្នាំ២០១៧។
អ្នកនាំពាក្យស្នងការប៉ូលិសទីក្រុងហ្សាការតាលោក Yusri Yunus បានថ្លែងប្រាប់ក្រុមអ្នកសារព័ត៌មានថា «យើងចាប់បានមនុស្សចំនួនបីនាក់ ដែលអាចមានជាប់ពាក់ព័ន្ធនឹងករណីបំផ្ទុះគ្រាប់បែកក្នុងសប្តាហ៍នេះ នៅទីតាំងចំនួនបីខុសគ្នានារសៀលថ្ងៃព្រហស្បតិ៍ម្សិលមិញនេះ»។ យោងតាមលោក Yusri កងកម្លាំងពិសេសប្រឆាំងភេរវកម្ម សហការជាមួយសមត្ថកិច្ចមូលដ្ឋាន បានធ្វើការឃាត់ខ្លួនបុរសចំនួនពីរនាក់ នៅក្នុងទីក្រុង Bandung លើកោះ Java និងជនទីបីនៅក្រុង Cimahi ដែលនៅក្បែរខាងគ្នា ហើយប៉ូលិសកំពុងបន្តធ្វើការឆែកឆេរផ្ទះរបស់ពួកគេ។
គួរបញ្ជាក់ថា កាលពីយប់ថ្ងៃពុធសប្តាហ៍នេះ ជនបំផ្ទុះគ្រាប់បែកអត្តឃាតចំនួនពីរនាក់ បានធ្វើការវាយប្រហារទៅលើចំណតរថយន្ដក្រុង Kampung Melayu នៃរដ្ឋធានីហ្សាការតាចំនួនពីរលើកបន្តបន្ទាប់គ្នា នាវេលាម៉ោងប្រហែល ៩៖០០នាទីយប់ (ម៉ោងក្នុងតំបន់កើតហេតុ) ហើយនាព្រឹកថ្ងៃសុក្រនេះ ទីភ្នាក់ងារព័ត៌មានរបស់ក្រុម ISIS បានចេញផ្សាយថា ខ្លួនគឺជាអ្នករៀបចំផែនការដ៏ខ្មៅងងឹតនេះ៕
