(គូឡាឡាំពួ)៖ ជនជាតិម៉ាឡេស៊ី០៩នាក់ដែលត្រូវបានកូរ៉េខាងជើងដោះលែង បានត្រឡប់មកដល់ប្រទេសម៉ាឡេស៊ីវិញហើយនៅព្រឹកថ្ងៃសុក្រនេះ បន្ទាប់ពីរដ្ឋាភិបាលទីក្រុងគូឡាឡាំពួយល់ព្រមប្រគល់សាកសព លោក គីម ជុងណាំ បងប្រុសម្ដាយទីទៃរបស់មេដឹកនាំកូរ៉េខាងជើង លោក គីម ជុងអ៊ុន ទៅកាន់ ទីក្រុងព្យុងយ៉ាង ដើម្បីបន្ធូរបន្ថយភាពតានតឹងនៃជម្លោះការទូតរវាងប្រទេសទាំងពីរ។ នេះបើតាមការ ចេញផ្សាយដោយសារព័ត៌មាន Channel News Asia នៅព្រឹកថ្ងៃសុក្រ ទី៣១ ខែមីនា ឆ្នាំ២០១៧។
យោងតាមមន្ត្រីប៉ូលិសម៉ាឡេស៊ី លោក គីម ជុងណាំ ត្រូវបានឃាតកស្រីពីរនាក់សម្លាប់ដោយប្រើសារធាតុគីមីពុល VX នៅឯអាកាសយានដ្ឋានទីក្រុងគូឡាឡាំពួ កាលពីថ្ងៃទី១៣ ខែកុម្ភៈ។ រីឯសហរដ្ឋអាមេរិក និងកូរ៉េខាងត្បូងបានចោទប្រកាន់ថាទីក្រុងព្យុងយ៉ាង គឺជាអ្នកទទួលខុសត្រូវលើអំពើឃាតកម្មនេះ ដែលបានធ្វើឱ្យម៉ាឡេស៊ី និងកូរ៉េខាងជើង សម្រេចចិត្តបណ្ដេញអគ្គរដ្ឋទូតចេញពីប្រទេសរៀងៗខ្លួន ព្រមទំាងបានហាមមិនឱ្យប្រជាជនរៀងៗខ្លួនចាកចេញផងដែរ។
ទោះបីជាយ៉ាងណាកាលពីថ្ងៃព្រហស្បតិ៍ នាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ និងស្ថានីយ៍ទូរទស្សរដ្ឋកូរ៉េខាងជើង បានអះអាងថាភាគីទំាងពីរបានឈានដល់កិច្ច ព្រមព្រៀងលុបចោលការហាមឃាត់ការធ្វើដំណើរ ជាថ្នូរនឹងការប្រគល់សាកសពលោក គីម ជុងណាំ ត្រឡប់ទៅកាន់កូរ៉េខាងជើងវិញ។
គួរបញ្ជាក់ថាជនជាតិម៉ាឡេស៊ីទំាង០៩នាក់ រួមមានមន្ត្រីស្ថានទូតម៉ាឡេស៊ីប្រចាំកូរ៉េខាងជើង០៣ និងសមាជិកគ្រួសាររបស់ពួកគេ ០៦នាក់បានត្រឡប់មកដល់អាកាសយានដ្ឋានទីក្រុងគូឡាឡាំពួ នៅមុនព្រះអាទិត្យរះនៅថ្ងៃសុក្រនេះ។ ចំណែកឯសពរបស់លោក គីម ជុងណាំ និងមន្ត្រីទូតកូរ៉េខាងជើងពីរនាក់ ដែលត្រូវបានគេសង្ស័យថា បានចូលរួមក្នុងអំពើឃាតកម្មលើ លោក គីម នឹងធ្វើដំណើរតាមជើងហោះហើរកូរ៉េខាងជើង Air Koryo ទៅកាន់ទីក្រុងព្យុងយ៉ាងនៅព្រឹកថ្ងៃសៅរ៍សប្ដាហ៍នេះ ក្រោយចាកចេញពីម៉ាឡេស៊ីទៅកាន់ទីក្រុងប៉េកាំង កាលពីថ្ងៃព្រហស្បតិ៍។ នេះបើតាមទីភ្នាក់ងារសារព័ត៌មានយ៉ុនហាប់៕
