(សេអ៊ូល)៖ សម្ព័ន្ធមិត្តទាំងបី អាមេរិក កូរ៉េខាងត្បូង និងជប៉ុន នឹងធ្វើសមយុទ្ធយោធាជើងទឹកទ្រង់ទ្រាយធំរួមគ្នាមួយនាសប្តាហ៍នេះ សំដៅបង្កើនសមត្ថភាពទប់ទល់ប្រឆាំងនឹងមីស៊ីលផ្លោងរបស់កូរ៉េខាងជើង នៅចំពោះមុខការកើនឡើងនៃសញ្ញាដែលថាទីក្រុងព្យុងយ៉ាង បានត្រៀមលក្ខណៈរួចជាស្រេចដើម្បីបាញ់សាកល្បងមីស៊ីលផ្លោង ICBM នោះ។ នេះបើតាមការចេញផ្សាយដោយទីភ្នាក់ងារព័ត៌មានកូរ៉េខាងត្បូង យុនហ៉ាប់ នៅមុននេះបន្តិចនាព្រឹកថ្ងៃសុក្រ ទី២០ ខែមករា ឆ្នាំ២០១៧។
កងទព័ជើងទឹកកូរ៉េខាងត្បូងបានឲ្យដឹងថា នាវាពិឃាតបំពាក់ដោយប្រព័ន្ធ Aegis ប្រឆាំងនឹងមីស៊ីលផ្លោងដែលមកពីប្រទេសទាំងបីនឹងចូលរួមក្នុងសមយុទ្ធរយៈពេលបីថ្ងៃនេះ ដើម្បីហ្វឹកហ្វាត់សមត្ថភាពចាប់សញ្ញា និងតាមដានមីស៊ីលរបស់កូរ៉េខាងជើង។ វាត្រូវបានបង្កើតឡើងក្នុងគោលបំណងពង្រឹងសមត្ថភាពនៃកងទ័ពរបស់ពួកគេក្នុងការឆ្លើយតបភ្លាមៗ ចំពោះការគំរាមកំហែងផ្នែកយោធាដែលកំពុងកើនឡើងពីសំណាក់រដ្ឋាភិបាលទីក្រុងព្យុងយ៉ាង។
គួរបញ្ជាក់ថាការធ្វើសមយុទ្ធទ្រង់ទ្រាយធំថ្មីនេះត្រូវបានរៀបចំឡើង ស្របពេលដែលមានការកត់សម្គាល់ឃើញថា កូរ៉េខាងជើងប្រហែលជាអាចបាញ់មីស៊ីលផ្លោង ICBM ចេញពីព្រលានយន្តហោះ Panghyon នៅភាគពាយ័ព្យប្រទេស ចំពេលលោក ដូណាល់ ត្រាំ ស្បថឡើងកាន់តំណែងជាប្រធានាធិបតីទី៤៥ នៃសហរដ្ឋអាមេរិកតែម្តង៕
