(វ៉ាស៊ីនតោន)៖ អនាគត​មេដឹកនាំ​សហរដ្ឋអាមេរិកលោក ដូណាល់ ត្រាំ បានតែងតាំង​ប្រធានមេធាវី​នៃក្រុមហ៊ុន Trump Orgazination របស់​លោកឲ្យកាន់មុខតំណែង​ដែលទើបត្រូវបា​ន​បង្កើតថ្មីមួយ ក្នុងជានាម​ជាអ្នកចរចា​អន្តរជាតិ​ជាន់ខ្ពស់។ នេះបើតាមសេចក្តីប្រកាស​របស់ក្រុម​ចាត់ចែង​កិច្ចការផ្ទេរ​តំណែងរបស់​លោកប្រធានាធិបតី​ជាប់ឆ្នោត ដែលចេញផ្សាយដោយសារព័ត៌មាន ​Channel News Asia នៅមុននេះបន្តិច​នាព្រឹកថ្ងៃពុធ ទី២៨ ខែធ្នូ ឆ្នាំ២០១៦។

លោក ចេសុន គ្រីនប្លាត់ (Jason Greenblatt) អគ្គនាយករង​ និងជាប្រធានក្រុម​មេធាវីនៃ​ក្រុមហ៊ុន Trump Organization ដែលជាមើលការ​ខុស​ត្រូវ​ចំពោះ​មុខជំនួញ​​​ ដ៏ធំមហាសាលរបស់លោក ដូណាល់ ត្រាំ នឹង​កាន់​តួនាទី​ជា​អ្នក​តំណាង​ពិសេស​​របស់​អាមេរិក​​ សម្រាប់រាល់​កិច្ច​ចរចា​អន្តជាតិ។ យ៉ាងណាមិញ​​ក្រុមចាត់ចែង​កិច្ចការផ្ទេរ​តំណែង​របស់លោក ត្រាំ មិនបានផ្តល់ព័ត៌មាន​លម្អិត​​ច្បាស់​អំពី​ភារ​កិច្ច​​នៃ​មុខ​តំណែង​ដែល​ទើប​នឹង​បង្កើតថ្មីនេះឡើយ ប៉ុន្តែកាលពីចុងសប្តាហ៍មុននេះស្ថានីយទូរទស្សន៍ CNN ដោយផ្អែកលើ​ប្រភពមិន​បញ្ចេញ​អត្តសញ្ញាណ​មួយ បានបង្ហើបឲ្យដឹងថា​ ភារកិច្ចរបស់​លោក គ្រីនប្លាត់ នឹងរួមបញ្ចូល​ទាំងដំណើរ​ការ​នៃកិច្ច​ចរចា​​សន្តិភាព​ អ៉ីស្រាអែល-ប៉ាឡេស្ទី, ទំនាក់ទំនង​ជាមួយប្រទេសគុយបា, និងកិច្ចព្រមព្រៀង​ពាណិជ្ជកម្ម​ដទៃៗទៀត។

គួរបញ្ជាក់ថា លោក ចេសុន គ្រីនប្លាត់ បានផ្តល់ប្រឹក្សាដល់លោក ដូណាល់ ត្រាំ ជុំវិញបញ្ហា​ជម្លោះ​ អារ៉ាប់-អ៉ីស្រាអែល នៅអំឡុងយុទ្ធនាការ​​ឃោសនាបោះឆ្នោត​របស់លោក ហើយ​លោក ត្រាំ បាននិយាយថា​ជួសមុខ​ឲ្យរូបលោក លោក គ្រីនប្លាត់ បានធ្វើការចរចា​​លើ​មុខ​ជំនួញ​​ដែល​មានភាព​ស្មុគស្មា ​និងសំខាន់ៗ​ជាច្រើន​ហើយលោក គ្រីនប្លាត់ ពិតជាសក្តិសម​បំផុតសម្រាប់មុខតំណែង​ដ៏ថ្មីសន្លាងនេះ ដែលទទួលបន្ទុក​ជួយជ្រោមជ្រែងកិច្ចចរចា​អន្តរជាតិគ្រប់ប្រភេទ និងកិច្ចព្រមព្រៀងពាណិជ្ជកម្ម​នៅទូទាំងពិភពលោក៕
   ​