(វ៉ាស៊ីនតោន)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថាលោកបានអញ្ជើញប្រធានាធិបតីបារាំង លោក អេម៉ានុយអែល ម៉ាក្រុង បំពេញទស្សនកិច្ចមកកាន់ប្រទេសអ៊ុយក្រែន ដើម្បីមើលដោយផ្ទាល់ភ្នែកនូវភស្ដុតាងដែលបង្ហាញថាទាហានរុស្ស៉ីបាន ប្រព្រឹត្តអំពើប្រល័យពូជសាសន៍ ជាពាក្យមួយដែលលោក ម៉ាក្រុងមិនហ៊ាននិយាយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី១៨ ខែមេសា ឆ្នាំ២០២២។

លោក ហ្សេលេនស្គី ធ្វើការកត់សម្គាល់ខាងលើនៅក្នុងបទសម្ភាសន៍ជាមួយទូរទស្សន៍ CNN កាលពីថ្ងៃសុក្រ ហើយត្រូវបានចាក់ផ្សាយកាលពី ថ្ងៃអាទិត្យចុងសប្ដាហ៍កន្លងទៅនេះ។ ថ្លែងនាឱកាសនោះ ប្រធានាធិបតីអ៊ុយក្រែនរូបនេះបានគូសបញ្ជាក់ដូច្នេះថា «ខ្ញុំបាននិយាយទៅកាន់គាត់ (លោក ម៉ាក្រុង) កាលពីម្សិលមិញ (ថ្ងៃព្រហស្បតិ៍ ទី១៤ ខែមេសា)។ ខ្ញុំគ្រាន់តែប្រាប់គាត់ថាខ្ញុំចង់ឱ្យគាត់យល់ថានេះមិនមែនជាសង្រ្គាមទេ ប៉ុន្តែជាវាជាអំពើប្រល័យពូជសាសន៍។ ដូច្នេះខ្ញុំបានអញ្ជើញគាត់ឱ្យមកមើលភស្តុតាងដោយផ្ទាល់ភ្នែក»។

គួរបញ្ជាក់ថា លោក ហ្សេលេនស្គី ក៏បានសង្កត់ធ្ងន់ដោយជឿជាក់ដែរថាលោក ម៉ាក្រុង មិនហ៊ានប្រើប្រាស់ពាក្យប្រល័យពូជសាសន៍ប្រឆាំងនឹង រុស្ស៉ី ដូចប្រធានាធិបតីអាមេរិក លោក ចូ បៃដិន ពីព្រោះលោកគិតថាវាអាចនឹងបំផ្លាញដល់ឱកាសក្នុងការរក្សាទំនាក់ទំនងការទូតជាមួយរុស្ស៉ី៕