(សិង្ហបុរី)៖ ប៉ូលិសសិង្ហបុរី នៅថ្ងៃអាទិត្យនេះបានឱ្យដឹងថាពួកគេបានចាប់ខ្លួនមនុស្ស ៣៥នាក់ នៅក្នុងប្រតិបត្តិការវាយឆ្មក់មួយមានរយៈពេល ៤ថ្ងៃ ប្រឆាំងនឹងករណីឆបោកមានជាប់ពាក់ព័ន្ធនឹងប្រាក់ជាង ៣១លានដុល្លារសិង្ហបុរី ឬស្មើនឹង ២២.៨៣លានដុល្លារអាមេរិក។ នេះបើតាម ការចេញផ្សាយដោយសារព័ត៌មាន CNA នៅថ្ងៃអាទិត្យ ទី២៧ ខែមីនា ឆ្នាំ២០២២។

នៅក្នុងចំណោមមនុស្សទាំង៣៥នាក់ខាងលើដែលត្រូវបានចាប់ខ្លួន ក្នុងនោះរួមមានបុរស ២៩នាក់ និងស្ត្រី ៦នាក់ដែលមានអាយុចន្លោះពី១៦ ដល់៦៦ឆ្នាំ។ ប៉ូលិសសិង្ហបុរីបានបញ្ជាក់បន្ថែមដូច្នេះថា «គិតជាសរុបមានមនុស្ស ២៥៥នាក់បានចូលរួម និងជួយដល់ការស៊ើបអង្កេតលើ ជនសង្ស័យមានជាប់ទាក់ទងនឹងការឆបោកច្រើនជាង ១,២០០ករណីដែលគិតជាទឹកប្រាក់ ៣១លានដុល្លារសិង្ហបុរី»។

គួរបញ្ជាក់ថា បើតាមប៉ូលិសសិង្ហបុរី, ជនរងគ្រោះភាគច្រើនត្រូវបានគេល្បួងឱ្យចូលរួមក្នុងការវិនិយោគតាមរយៈបណ្ដាញទំនាក់ទំនងសង្គម ដោយ ជនឆបោកបានអះអាងថាពួកគេនឹងផ្ទេរប្រាក់ចំណេញតាមគណនីធនគាររបស់ជនរងគ្រោះ និងការបោកប្រាស់ជួយរកការងារឱ្យជាដើម៕