(ហុងកុង)៖ មន្ត្រីហុងកុងបាននិយាយថា និសិ្សតចំនួន ០៤នាក់ ជាប់ទាក់ទងនឹងអតីតក្រុមឯករាជ្យមួយ ត្រូវបានចាប់ខ្លួនដោយប៉ូលីស កាលពីថ្ងៃពុធ ស្ថិតក្រោមច្បាប់សន្តិសុខជាតិថ្មី ដែលទើបត្រូវបានអនុម័តកាលពីខែមុន។ នេះបើតាមការចេញផ្សាយដោយសារព័ត៌មាន CNA នារសៀលថ្ងៃព្រហស្បតិ៍ ទី៣០ ខែកក្កដា ឆ្នាំ២០២០។

ប៉ូលីសហុងកុងបានអះអាងថា យុវជន ០៣នាក់ និងយុវតីម្នាក់ ដែលមានអាយុចាប់ពី ១៦-២១ឆ្នាំត្រូវបានចាប់ខ្លួន ពីបទសង័្សយក្នុងការរៀបចំទង្វើញុះញង់ ដែលនាំឲ្យមានការបែងចែកបក្ខពួក។

លោក លី ក្វៃវ៉ា (Li Kwai-wah) មន្រ្តីប៉ូលីសមកពី កងអង្គភាពសនិ្តសុខជាតិថ្មីបាននិយាយថា តាមប្រភព និងការស៊ើបអង្កេត មួយចំនួនបានបង្ហាញថា ក្រុមនេះទើបតែបានប្រកាសនៅលើបណ្ដាញសង្គម ដើម្បីបង្កើតអង្គការមួយ ដែលទាមទារឲ្យមានការគាំទ្រ ទៅលើក្រុមទាមទារឯករាជ្យនៅហុងកុង តែត្រូវបានរំសាយដោយប៉ូលិស ក្រោមច្បាប់សន្តិសុខជាតិថ្មី ដែលអនុម័តដោយទីក្រុងប៉េកាំង។
ច្បាប់សន្តិសុខជាតិថ្មី ដែលត្រូវបានដាក់ឲ្យអនុវត្តនៅហុងកុង ក្នុងរយៈពេលមួយខែមកហើយនេះ មានគោលដៅទប់ស្កាត់ ការបំបែករដ្ឋ, ការធ្វើវិទ្ធង្សនា, ការធ្វើភេរវកម្ម និងការគប់គិតជាមួយកម្លាំងបរទេស ដើម្បីបង្កចលាចលផ្ទៃក្នុងហុងកុង។ លោក Li Kwai-wah បានបន្ថែមទៀតថា ទូរស័ព្ទ និងឯកសារដែលជាប់ទាក់ទង ត្រូវបានរឹបអូសដោយក្រុមមន្រី្តប៉ូលីស ហើយអ្នកដែលត្រូវបានចាប់ខ្លួន ទាំងអស់គឺជានិស្សិត។

គួរបញ្ជាក់តាមសម្តីអតីតសមាជិក នៃក្រុមែលធ្លាប់តស៊ូគាំទ្រ ឯករាជ្យភាពហុងកុងបានអះអាងថា អតីតមេដឹកនាំរបស់ខ្លួនគឺ ថូនី ជុង (Tony Chung) អាយុ ១៩ឆ្នាំ ក៏ស្ថិតក្នុងចំណោមនិស្សិត ដែលត្រូវបានចាប់ខ្លួននោះដែរ៕