(ញូដេលី)៖ រថយន្តធុនធំចំនួនពីរគ្រឿង បានបុកគ្នាពេញមួយទំហឹង​នៅក្នុងរដ្ឋ យូតថា ប្រាដែស (Uttar Pradesh) ភាគខាងជើងប្រទេសឥណ្ឌា កាលពីវេលាម៉ោង ៣៖៣០នាទីទាបភ្លឺថ្ងៃសៅរ៍ ទី១៦ ខែឧសភា ឆ្នាំ២០២០ នេះតែម្តង (ម៉ោងនៅរដ្ឋធានីញូដេលី)។ នេះបើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ។

បើតាមការបញ្ជាក់ពីអាជ្ញាធរឥណ្ឌា ហេតុការណ៍គ្រោះថ្នាក់ចរាចរណ៍ដ៏៏អាក្រក់ខាងលើនេះ បានកើតមានឡើង​នៅក្នុងស្រុក អូរ៉ៃយ៉ា (Auraiya) នៃរដ្ឋ Uttar Pradesh រវាងរថយន្តដឹកទំនិញមួយគ្រឿង និងរថយន្តដឹកអ្នកដំណើរមួយគ្រឿងទៀត។

គួរបញ្ជាក់ថា អាជ្ញាធរបានរកឃើញអ្នកស្លាប់ ២៤នាក់នៅហ្នឹងកន្លែងកើតហេតុតែម្តង ខណៈ ៣៥នាក់ទៀតរងរបួស ក្នុងនោះមួយចំនួនរបួសធ្ងន់ ត្រូវបានបញ្ជូនទៅមន្ទីរពេទ្យ។ ហេតុការណ៍គ្រោះថ្នាក់ចរាចរណ៍នេះ បានកើតមានឡើងនៅអំឡុងពេលដែល​ប្រទេសឥណ្ឌាកំពុងស្ថិតក្នុងការបិទទ្វារនៅឡើយ ដើម្បីទប់ទល់នឹងជំងឺរាតត្បាតសកល COVID-19៕