(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយថាសហរដ្ឋអាមេរិក នឹងមានវ៉ាក់សាំងប្រឆាំងវីរុសកូរ៉ូណាថ្មី ( COVID-19) នៅត្រឹមចុងឆ្នាំ២០២០នេះ។ នេះបើតាមការចេញផ្សាយដោយសារព័ត៌មាន CNA នៅថ្ងៃចន្ទ ទី០៤ ខែឧសភា ឆ្នាំ២០២០។

លោក ដូណាល់ ត្រាំ ធ្វើការអះអាងបែបនេះ នៅក្នុងបទសម្ភាសន៍ជាមួយទូរទស្សន៍ Fox News កាលពីថ្ងៃអាទិត្យ (ម៉ោងនៅវ៉ាស៊ីនតោន)។ ថ្លែងនាឱកាសនោះ លោក ត្រាំ បានលើកឡើងដូច្នេះថា៖ «យើងពិតជាមានជំនឿចិត្តថា យើងនឹងអាចផលិតបានវ៉ាក់សាំងនៅត្រឹមចុងឆ្នាំ២០២០នេះ...ហើយខ្ញុំក៏សង្ឃឹមដែរថា សាលារៀន និងសាកលវិទ្យាល័យនានាអាចនឹងបើកទ្វារឡើងវិញ នៅខែកញ្ញាខាងមុខនេះ»។

គួរជម្រាបថា បើតាមគេហទំព័រ worldometers បច្ចុប្បន្ន សហរដ្ឋអាមេរិក មានអ្នកឆ្លង COVID-19 ១,១៨៨,០២៩នាក់ ក្នុងនោះស្លាប់ ៦៨,៥៨៧នាក់ និងជាសះស្បើយឡើងវិញ ១៧៨,២៦៣នាក់៕