(ប៉េកាំង)៖ ទីភ្នាក់ងារព័ត៌មានចិនស៊ីនហួរ បានចេញផ្សាយនៅមុននេះបន្តិច នារសៀលថ្ងៃសុក្រ ទី២៧ ខែមីនា ឆ្នាំ២០២០នេះថា ប្រធានាធិបតីចិនលោក ស៊ី ជិនពីង និងប្រធានាធិបតីអាមេរិកលោក ដូណាល់ ត្រាំ បានធ្វើការពិភាក្សាគ្នាតាមទូរស័ព្ទ ស្តីអំពីស្ថានការណ៍នៃជំងឺរាតត្បាត COVID-19 នៅក្នុងប្រទេសមហាយក្សសេដ្ឋកិច្ចទាំងពីរ។

កិច្ចពិភាក្សាគ្នាតាមទូរស័ព្ទនេះ បានកើតមានឡើងតែប៉ុន្មានម៉ោងប៉ុណ្ណោះ ក្រោយពីសារព័ត៌មានអាមេរិក ញូយ៉កប៉ុស្តិ៍ បានចេញផ្សាយថា លោកប្រធានាធិបតីបានបញ្ជាក់អំពីការត្រៀមបើកកិច្ចសន្ទនាតាមទូរស័ព្ទ ជាមួយមេដឹកនាំកំពូលចិន ដោយលោក ត្រាំ ផ្ទាល់បានគូសបញ្ជាក់ថា ប្រធានាធិបតីចិនលោក ស៊ី ជិពីង បានស្មើសុំឲ្យមានកិច្ចសន្ទនាជាមួយគ្នា ពាក់ព័ន្ធនឹងស្ថានការណ៍នៃវីរុសកូរ៉ូណាថ្មី (COVID-19)។

ទោះបីជាបែបនេះក្តី អត្ថន័យជារួមនៃកិច្ចសន្ទនាខាងលើនេះ គឺមិនទាន់ត្រូវបានបញ្ចេញដោយភាគីទាំងពីរ ចិន និងអាមេរិក នៅឡើយទេ៕