(ហ្សឺណែវ)៖ អង្គការសុខភាពពិភពលោក (WHO) បានអះអាងថា វាដូចជាលឿនពេកហើយក្នុងការប្រកាសចាត់ទុក ជំងឺផ្លូវដង្ហើមបង្កឡើងដោយវីរុសកូរ៉ូណាថ្មី (coronavirus) នៅប្រទេសចិន ជាការព្រួយបារម្ភថ្នាក់អន្តរជាតិ តាមរយៈការប្រកាសភាពអាសន្នផ្នែកសុខាភិបាលសាធារណៈនោះ។ តែទន្ទឹមគ្នា អង្គការនេះក៏បានព្រមានដែរថា ចំនួនករណីឆ្លងអាចនឹងផ្ទុះឡើងកាន់តែច្រើន ខណៈវីរុសថ្មីនេះនៅតែស្ថិតនៅក្នុងភាពអាថ៌កំបាំងនៅឡើយ។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ីនហួរ នៅព្រឹកថ្ងៃសុក្រ ទី២៤ ខែមករា ឆ្នាំ២០២០។

ថ្លែងនៅក្នុងសន្និសីទសារព័ត៌មាន ក្រោយកិច្ចប្រជុំបិទទ្វារ នៃគណៈកម្មាធិការប្រកាសភាពអាសន្ន (EC) នៅថ្ងៃព្រហស្បតិ៍សប្ដាហ៍នេះ លោក ថេរ៉ូស អ៊ែដាណម ហ្គែប្រេយែសឹស (Tedros Adhanom Ghebreyesus) បានគូសបញ្ជាក់ដូច្នេះថា «ខ្ញុំមិនប្រកាសពីភាពអាសន្ន ផ្នែកសុខាភិបាលសាធារណៈអន្តរជាតិនោះទេ បន្ទាប់ពីគណៈកម្មាធិការប្រកាសភាពអាសន្ន បានជួបប្រជុំគ្នាថា តើគួរតែចាត់ទុកវីរុសកូរ៉ូណាថ្មី (coronavirus) នៅប្រទេសចិន ជាការព្រួយបារម្ភអន្តរជាតិ នៃភាពអាសន្នសុខាភិបាលសាធារណៈ ឬក៏យ៉ាងណា។ តែជាការពិតវីរុសថ្មីនេះជាភាពអាសន្នសម្រាប់ចិន ហើយមិនទាន់ក្លាយជាភាពអាសន្ន ផ្នែកសុខាភិបាលជាសកលនោះឡើយ»។

គួរជម្រាបថា វីរុសកូរ៉ូណាថ្មី (coronavirus) បានសម្លាប់មនុស្សកើនដល់២៥នាក់នៅក្នុងប្រទេសចិន រីឯចំនួនអ្នកឆ្លងបានកើនដល់ ៨៣០នាក់ ហើយក្រៅពីចិន ថៃ វៀតណាម សិង្ហបុរី កោះតៃវ៉ាន់ កូរ៉េខាងត្បូង ជប៉ុន និងសហរដ្ឋអាមេរិក ក៏មានសេចក្ដីរាយការណ៍ពីករណី ផ្ទុះឡើងនៃវីរុសនេះដេរ តែមិនទាន់មានសេចក្ដីរាយការណ៍ពីអ្នកស្លាប់ឡើយ៕