(ម៉ូស្គូ)៖ រដ្ឋមន្ត្រីការបរទេសរុស្ស៊ីលោក ស៊ឺហ្គៃ ឡាវរ៉ូវ (Sergei Lavrov) បានលើកឡើងថា ក្រុមប្រឹក្សាសន្តិសុខនៃអង្គការសហប្រជាជាតិ (UNSC) ទំនងជានឹងមិនទទួលយកសេចក្តីព្រាងដំណោះស្រាយរបស់សហរដ្ឋអាមេរិកនោះឡើយ ព្រោះតែក្នុងនោះមានចេតនាបើកផ្លូវក្នុងឲ្យមានអន្តរាគមន៍ ទៅក្នុងវិបត្តិវេណេស៊ុយអេឡា។ នេះបើតាមការចេញផ្សាយដោយ Sputnik នាល្ងាចថ្ងៃអង្គារ ទី១២ ខែកុម្ភៈ ឆ្នាំ២០១៩។
លោក ឡាវរ៉ូវ បានលើកឡើងនៅថ្ងៃអង្គារនេះថា «ក្រុមប្រឹក្សាសន្តិសុខ UN គ្មានថ្ងៃនឹងទទួលយកសេចក្តីសម្រេចរបៀបនេះឡើយ ដូចដែលអ្នកផ្ទាល់យល់ហើយ...។ វាជាចេតនាក្នុងការទាញចំណាប់អារម្មណ៍ ពីអ្វីដែលជាពិត តាមរយៈសេចក្តីព្រាងដំណោះស្រាយធ្វើឡើងដោយសហរដ្ឋអាមេរិកនោះ....។ ពិតណាស់ វាជាចេតនាចង់បង្កហេតុដោយប្រើប្រាស់ក្បួនដឹកជំនួយមនុស្សធម៌ ជាមធ្យោយបាយដើម្បីបង្កអស្ថិរភាពនៅក្នុងប្រទេសវេណេស៊ុយអេឡា ហើយក៏នឹងបានលេសក្នុងការធ្វើអន្តរាគមន៍យោធាតែម្តង...»។
គួរបញ្ជាក់ថា ប្រទេសរុស្ស៊ី និងចិនដែលគាំទ្ររដ្ឋាភិបាលលោក ម៉ាឌូរ៉ូ គឺជាប្រទេសស្ថិតនៅក្នុងចំណោមប្រទេសមហាអំណាចធំៗទាំង ៥ (P5) នៅក្នុងក្រុមប្រឹក្សាសន្តិសុខ UN ដែលមានសមាជិកសរុប ១៥ប្រទេស ហើយដំណោះស្រាយនានានឹងមិនអាចសម្រេចចេញបានឡើយ ប្រសិនបើប្រទេសណាមួយក្នុងចំណោម ៥ នេះចេញមុខ Veto ឬជំទាស់ បើទោះបីជាសមាជិកមិនអចិន្ត្រៃយ៍ចំនួន ១០ប្រទេសទៀតបានយល់ព្រមក៏ដោយ។
ចំពោះមុខវិបត្តិវេណេស៊ុយអេឡានេះ ប្រទេសរុស្ស៊ីបានបង្ហាញជំហររបស់ខ្លួនដោយគាំទ្រលោកប្រធានាធិបតី ម៉ាឌូរ៉ូ ដែលបានជាប់ឆ្នោត និងទើបស្បថឡើងកាន់តំណែងជាផ្លូវការ ខណៈអាមេរិក និងសម្ព័ន្ធមិត្តមួយចំនួនទៀតវិញបានគាំទ្រមេបក្សប្រឆាំងវេណេស៊ុយអេឡាគឺលោក ជូអាន ហ្គៃដូ ជាប្រធានាធិបតីស្តីទី ហើយស្នើឲ្យលោក ម៉ាឌូរ៉ូ ចុះចេញពីតំណែងដោយសន្តិវិធី ដើម្បីរៀបចំការបោះឆ្នោតឡើងវិញ។
ទោះបីជាបែបនេះក្តី រដ្ឋាភិបាលលោក នីកូឡាស់ ម៉ាឌូរ៉ូ ដែលមានយោធាគាំទ្រពេញទំហឹងនោះ បានបង្ហាញជំហរដដែល គឺមិនចុះញ៉មសហរដ្ឋអាមេរិកនោះឡើយ ព្រមទាំងកំពុងធ្វើសមយុទ្ធយោធាទ្រង់ទ្រាយធំមិនធ្លាប់មានថែមទៀត ដើម្បីបង្កើនសមត្ថភាពត្រៀមទប់ទល់នឹងការឈ្លានពានណាមួយ ដែលអាចកើតមានឡើង៕
