(ឡូសអាន់ជែឡេស)៖ ករណីបាញ់ប្រហារយ៉ាងកក្រើកបានផ្ទុះឡើងនៅទីក្រុង ថូរែន (Torrence) នៃតំបន់ឆ្នេរក្បែរទីក្រុងឡូសអាន់ជែឡេស ស្ថិតក្នុងរដ្ឋកាលីហ្វ័រញ៉ាសហរដ្ឋអាមេរិក ដោយបានផ្តាច់ជីវិតមនុស្ស០៣នាក់ និងមួយចំនួនទៀតរងរបួស។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នាល្ងាចថ្ងៃសៅរ៍ ទី០៥ ខែមករា ឆ្នាំ២០១៩។
ទីក្រុង Torrence ជាតំបន់ឆ្នេរកម្សាន្តដ៏ពេញនិយមមួយរបស់សហរដ្ឋអាមេរិក ដែលស្ថិតនៅចម្ងាយ ៣០គីឡូម៉ែត្រនៃភាគនិរតី ទីក្រុងឡូសអាន់ជែឡេស។ ខណៈនេះមិនទាន់មានការបញ្ជាក់ថា ការបាញ់ប្រហារនោះកើតមានឡើងរវាងភាគីណា និងភាគីណាឡើយ ប៉ុន្តែកន្លែងនោះត្រូវបានគេស្គាល់ថា ជាទីតាំងដ៏ពេញនិយមសម្រាប់ក្រុមមនុស្សវ័យក្មេង និងយុវវ័យមកលេងបោះប៊ូលីង (Bowling) និងជាក្លឹបកម្សាន្តថែមទៀត។
គួរបញ្ជាក់ថា ប៉ូលិសទីក្រុង Torrence បានអំពាវនាវឲ្យមនុស្សម្នាស្ថិតនៅឆ្ងាយពីតំបន់កើតហេតុខាងលើនេះសិន ព្រោះការស៊ើបអង្កេតជាក់ស្តែងកំពុងប្រព្រឹត្តទៅនៅឡើយ។ ប៉ូលិសបានបញ្ជាក់ទៀតថា សំឡេងផ្ទុះត្រូវបានលាន់លឺចេញពីក្នុងកន្លែងកម្សាន្តបោះប៊ូលីង ដោយមានចំនួន ០៩គ្រាប់ផ្ទុះជាប់ៗគ្នា៕
