(ប៉េកាំង)៖ ផ្កាយរណបចំនួនពីរគ្រឿង ដែលមានតួនាទីអង្កេត និងបញ្ជូនទិន្នន័យមកកាន់ភពផែនដីនោះ ត្រូវបានបាញ់បង្ហោះដោយជោគជ័យហើយ ទៅកាន់គន្លងតារាវិថីពីលើភពផែនដីរបស់យើង ដោយក្រុមការងារបាញ់បង្ហោះផ្កាយរណបនៃប្រទេសចិន។ នេះបើតាមការចេញផ្សាយដោយសារព័ត៌មានចិន ស៊ីនហួរ នាព្រឹកថ្ងៃអង្គារ ទី០៩ ខែតុលា ឆ្នាំ២០១៨។
ផ្កាយរណបទាំងពីរគ្រឿងខាងលើនេះ ត្រូវបានបាញ់បង្ហោះចេញពីមូលដ្ឋានបាញ់បង្ហោះ Jiuquan នៃខេត្តភាគពាយ័ព្យរបស់ប្រទេសចិន កាលពីវេលាម៉ោង ១០៖៤៣នាទីព្រឹក ដោយពួកវាគឺស្ថិតនៅក្នុងចង្កោមផ្កាយរណប Yaigan-32 ដែលត្រូវបានដឹកនាំដោយរ៉ុក្កែត Long March-2C ផលិតឡើងដោយចិនផ្ទាល់ ទៅកាន់ទីអវកាស។
គួរបញ្ជាក់ថា ប្រទេសចិនជារៀងរាល់ឆ្នាំតែងតែធ្វើការបាញ់បង្ហោះ ផ្កាយរណបជាច្រើនគ្រឿង ទាំងសម្រាប់បម្រើឲ្យវិស័យរដ្ឋបាល និងសម្រាប់ក្រុមហ៊ុនឯកជន ព្រមទាំងបរទេសផងដែរ។ ផ្កាយរណបទាំងនោះមានតួនាទីផ្សេងៗពីគ្នា ដោយខ្លះត្រូវប្រើប្រាស់សម្រាប់អង្កេតបរិយាកាស បរិស្ថាន និងបម្រែបម្រួលធម្មជាតិ ហើយមួយចំនួនទៀតបម្រើវិស័យទូរគមនាគមន៍ ព្រមទាំងវិស័យស្រាវជ្រាវវិទ្យាសាស្ត្រមួយចំនួនទៀត៕
