(ញូយ៉ក)៖ ប្រធានាធិបតីអាមេរិកលោក ដូណាល់ ត្រាំ បានធ្វើឱ្យមេដឹកនាំពិភពលោកជាច្រើនផ្ទុះសំណើចឥតព្រៀងទុក នៅពេលដែលលោកប្រាប់មហាសន្និបាតអង្គការសហប្រជាជាតិថា «សេដ្ឋកិច្ចអាមេរិកកំពុងស្គាល់ភាពរុងរឿងបំផុត មិនធ្លាប់មានពីមុនមក»។ នេះ បើតាមការចេញផ្សាយដោយសារព័ត៌មាន Russian Today នៅថ្ងៃពុធ ទី២៦ ខែកញ្ញា ឆ្នាំ២០១៨។
នៅក្នុងសុន្ទរកថាប្រចាំឆ្នាំរយៈពេល ៣៥នាទី ទៅកាន់មហាសន្និបាតអង្គការសហប្រជាជាតិ នៅថ្ងៃអង្គារសប្ដាហ៍នេះលោក ដូណាល់ ត្រាំ ថែមទាំងអះអាងទៀតថា លោកសម្រេចបាននូវសមិទ្ធផលជាច្រើន ក្នុងរយៈពេលជាង ២ឆ្នាំមកនេះ ដែលរដ្ឋបាលអាមេរិកមុនៗមិនអាចធ្វើបាន។ ប៉ុន្តែគ្រាន់តែថ្លែងបែបនេះភ្លាម មេដឹកនាំ និងក្រុមប្រតិភូរដ្ឋាភិបាលជាច្រើនបែរជានាំគ្នាសើចទៅវិញ ជាពិសេស នៅពេលលោក ត្រាំ ព្រមានថាអាល្លឺម៉ង់អាចនឹងពឹងផ្អែកទាំងស្រុងលើថាមពលរុស្ស៊ីក្រុមប្រតិភូរដ្ឋាភិបាលអាល្លឺម៉ង់នាំគ្នាផ្ទុះសំណើចភ្លាមៗ។
ម្យ៉ាងវិញទៀត ក្រោយឃើញមេដឹកនាំទាំងនេះសើច លោក ដូណាល់ ត្រាំ បានត្រឹមតែនិយាយថា លោកមិនរំពឹងថាមានប្រតិកម្មបែបនេះសោះ តែលោកថា «វាមិនមានបញ្ហាអីនោះទេ»។ តែទោះបីជាយ៉ាងនេះក្ដី ប្រធានាធិបតីអាមេរិករូបនេះបានអះអាងថា ក្រោមការដឹកនាំរបស់លោក សហរដ្ឋអាមេរិកសព្វថ្ងៃកំពុងស្គាល់ភាពខ្លាំងក្លា សុវត្ថិភាព និងរុងរឿងបំផុតមិនធ្លាប់មាន ហើយថារដ្ឋបាលរបស់លោក នឹងតស៊ូដើម្បីសហរដ្ឋអាមេរិក និងពិភពលោកទាំងមូល៕
