(ភ្នំពេញ)៖ មួយរយៈចុងក្រោយមកនេះ គេសម្គាល់ឃើញថា មានសិល្បករ-សិល្បករិនីជាច្រើន បញ្ចេញប្រតិកម្មក្នុងបណ្តាញសង្គមហ្វេសប៊ុកជាហូរហែ ខណៈភាគច្រើនបង្ហាញពីការក្តៅស្លឹកត្រចៀក ទាមទារឲ្យម្ចាស់ផលិតកម្មបើកលុយថ្លៃថតភាពយន្តដល់ខ្លួន ព្រោះតែម្ចាស់ផលិតកម្មខ្លះជំពាក់យូរពេក។ ដោយឡែកសម្រាប់តារាសម្ដែងស្រី ឌុច លីដា វិញ ហាក់ដូចជាគ្មានការព្រួយបារម្ភ ក៏ដូចជាភ័យខ្លាច ពាក់ព័ន្ធរឿងនេះទាល់តែសោះ ទោះបីជាកន្លងមកធ្លាប់មានតារាសម្ដែងជាច្រើន បានប្ដឹងប្ដល់ ក៏ដូចជាកើតមានជម្លោះជាមួយនឹងខាងផលិតកម្ម ពាក់ព័ន្ធនឹងរឿងជំពាក់លុយមិនសងនេះក៏ដោយ។
ស្រីស្រស់សម្រស់បាន ឌុច លីដា ថ្លែងយ៉ាងដូច្នេះថា «ចា៎បង! សម្រាប់ខ្ញុំ គឺគ្មានការភ័យខ្លាច ចំពោះរឿងផលិតករ ជំពាក់លុយ ក្នុងពេលសម្ដែងភាពយន្ត ឲ្យផលិតកម្មគាត់នោះទេ សំខាន់ក្នុងពេលចុះកុងត្រា គឺពួកយើងបាននិយាយគ្នាច្បាស់ ធម្មតាការយឺតយ៉ាវ លុយកាក់បន្តិចបន្តួច ខ្ញុំអាចនិយាយគ្នាបាន សំខាន់បើសិនមានរឿងបែបនេះមែន ផលិតករក៏គួរតែប្រាប់ ឬឲ្យដំណឹងដល់ខ្ញុំមុនដែរ»។
តារាសម្ដែងសាច់សខ្ចីរូបនេះ ក៏បានសំណូមពរឲ្យ ខាងផលិតករមួយចំនួន ចេះផ្ដល់តម្លៃ ដល់តួសម្ដែង មិនថាតួឯក ឬក៏តួរាយរង ពាក់ព័ន្ធនឹងការផ្ដល់តម្លៃ លើការងារ ជាពិសេសនោះ គឺ ពាក់ព័ន្ធនឹងការផ្ដល់ប្រាក់កម្រៃ និងផ្ដល់កិត្តិយសដល់តារាសម្ដែង ទាំងអស់ផងដែរ៕
