(ភ្នំពេញ)៖ ជារឿងមួយគួឲ្យភ្ញាក់ផ្អើលខ្លាំង ក្នុងមជ្ឈដ្ឋានសិល្បៈខ្មែរ ខណៈដែលក្រសួងវប្បធម៌ និងវិចិត្រសិល្បៈ បានលេងធម៌ក្ដៅ ចាត់វិធានការយ៉ាងចាស់ដៃ ទៅតារាល្បីៗ ដែលតែងតែបញ្ចេញភាពសិចស៊ី តាមបណ្ដាញសង្គម និងតាមកម្មវិធីសាធារណៈផ្សេងៗ ខណៈដែលថ្មីៗនេះ បន្ទាប់ពីក្រសួងបានផ្អាកសកម្មភាពសិល្បៈ លើតារាសម្ដែងសិចស៊ី កញ្ញា សេង សូណា រយៈពេល១ឆ្នាំរួចមក នៅពេលនេះក្រសួងវប្បធម៌ និងវិចិត្រសិល្បៈបានចេញលិខិតប្រកាសព្រមានជាផ្លូវការ ដល់តារាប្រុសស្រីល្បីៗ ចំនួន៤ដួងទៀត មានដូចជា អ្នកនាង សុខ ស្រីម៉ុច, កញ្ញា រតនៈ ពិសី, កញ្ញា ពេជ្រ អាវីហ្សា និងលោក អេនឌី ក្រោយពីក្រសួងរកឃើញថា តារាទាំងអស់នេះ ធ្វើឲ្យប៉ះពាល់ខ្លាំងដល់ប្រពៃណី និងវប្បធម៌ខ្មែរ។
តារាចម្រៀង និងតារាសម្ដែងខ្មែរ ដែលត្រូវបានក្រសួងវប្បធម៌ចាត់ទុកថា ធ្វើឲ្យប៉ះពាល់ទំនៀមទម្លាប់ប្រពៃណីខ្មែរ រហូតមានការថ្នាំងថ្នាក់យ៉ាងខ្លាំង ពីបណ្ដាអ្នកលេងបណ្ដាញសង្គម Facebook គឺអ្នកនាង សុខ ស្រីម៉ុច, កញ្ញា រតនៈ ពិសី, កញ្ញា ពេជ្រ អាវីហ្សា និង អេនឌី ត្រូវបានក្រសួងវប្បធម៌ និងវិចិត្រសិល្បៈ ចេញសេចក្តីសម្រេចព្រមានជាផ្លូវការ កាលពីថ្ងៃទី១៧ ខែកញ្ញា ឆ្នាំ២០១៨ នេះ ដោយក្រសួងតម្រូវឲ្យពួកគេទាំង៤ខាងលើ បញ្ឈប់ជាបន្ទាន់នូវទង្វើ ដែលធ្វើឲ្យប៉ះពាល់ដល់ទំនៀមទម្លាប់ប្រពៃណីជាតិ។ ក្នុងករណីនៅតែគឃ្លើនបន្ត ធ្វើបែបនេះទៀត ក្រសួងនឹងមានវិធានការតាមក្រុមប្រឹក្សាពិន័យ ដោយត្រូវធ្វើការពិន័យ ឬផ្អាកសកម្មភាពសិល្បៈណាមួយ តាមទំហំកំហុសឆ្គងរបស់ខ្លួន។
យោងតាមលិខិតលេខ ៥៥ សសរ ចុះហត្ថលេខាដោយលោក ថៃ នរៈសត្យា រដ្ឋលេខាធិការក្រសួងវប្បធម៌ និងវិចិត្រសិល្បៈត្រង់ប្រការ ២ បានព្រមានចំៗដល់អ្នកទាំង៤ថា «ត្រូវបញ្ឈប់ទង្វើ ដែលនាំឲ្យប៉ះពាក់វប្បធម៌ ទំនៀមទំលាប់ ប្រពៃណីជាតិ។ ករណីនៅតែបន្តក្រុមប្រឹក្សាវិន័យ និងលើកសរសើរ នឹងមានវិធានការតាមក្រមសីលធម៌ នៃអ្នកសិល្បៈ ដោយផ្អាកសកម្មភាពទាក់ទងនឹង វិស័យសិល្បៈវប្បធម៌ ទៅតាមរយៈពេលណាមួយ សមស្របតាមកំហុសឆ្គងនៃអ្នកប្រព្រឹត្ត»។
ជាការពិតក្នុងចំណោមតារាទាំង ៤ដួង ខាងលើ សុខ ស្រីម៉ុច ទើបតែរន្ទឺខ្លាំង ក្នុងអំឡុងពេលចុងក្រោយ ពេលដែលនាងបានរំលេចកេរ្តិ៍លើឆាក ផ្អើលអស់ប្រុសៗ មិននឹកស្មានថា នាងជានារីខ្មែរ ហ៊ានស្លៀកពាក់បែបនេះឡើយ។
សូមបញ្ជាក់ថា តារាចម្រៀង រតនៈ ពិសី, កញ្ញា ពេជ្រ អាវីហ្សា និងលោក អេនឌី គឺត្រូវបានគេមើលឃើញថា ជាតារាជាប់ក្នុងបញ្ជីខ្មៅ របស់ក្រសួងយូរណាស់ហើយ តែដោយអ្នកទាំង ៣ នៅតែបន្តសម្ញែងទ្រូង មិនព្រមបញ្ឈប់នោះ ទើបក្រសួងចេញសេចក្តីសម្រេចព្រមាន ដំណាលគ្នានឹង សុខ ស្រីម៉ុច ដែរ៕