(បរទេស)៖ ខណៈ «Fast X» រឿងទី១០ នៃសែស្រឡាយ «Fast & Furious» គ្រោងនឹងចាក់បញ្ចាំងនៅរោងកុន នៅថ្ងៃទី១៨ ខែឧសភា ឆ្នាំ២០២៣ខាងមុខនេះ សម្រាប់ Part1 នោះ នៅពេលនេះស្រាប់តែមានដំណឹងថា Dwayne Johnson ឬ The Rock នឹងវិលមកក្នុងសែស្រឡាយ Fast & Furious ឡើងវិញក្នុងតួអង្គ Luke Hobbs ឬភ្នាក់ងារ Hobbs ក្នុង «FAST X»។ នេះបើតាមការចេញផ្សាយរបស់គេហទំព័រព័ត៌មាន The Wrap។
តាមសារព័ត៌មាន TheWrap បានឲ្យដឹងថា Dwayne Johnson ឬ The Rock នឹងវិលមកក្នុងសែស្រឡាយ «Fast & Furious» ឡើងវិញក្នុងតួអង្គ Luke Hobbs ឬភ្នាក់ងារ Hobbs ក្នុងរឿង «FAST X» ដែលគ្រោងបញ្ចាំងនាប៉ុន្មានថ្ងៃខាងមុខនេះ។ កាលពីឆ្នាំ២០២១ The Rock ធ្លាប់បានបដិសេដ Vin Disel ថានឹងមិនវិលមកវិញទេ។
ទោះជាយ៉ាងណាក្តី មានការរំពឹងថា The Rock អាចនឹងធ្វើឲ្យ រឿងត្រកូល FAST ចំនួន ៣វគ្គចុងក្រោយនេះ ជក់ចិត្តដែរឬក៏អត់នោះទេ ព្រោះថាវគ្គក្រោយៗនេះ ហាក់ដូចជាមិនសូវបំពេញចិត្តទស្សនិកជនឡើយ ខណៈអ្នកតាមដានមួយចំនួនបានអះអាងថា វគ្គក្រោយៗគឺ លេងហួសហេតុជ្រុលពេក ប៉ុន្តែបែរទទួលបានចំណូលច្រើនទៅវិញ។
គួរបញ្ជាក់ថា «Fast & Furious » វគ្គ៥ ទទួលបានការវាយតម្លៃយ៉ាងគគ្រឹកគគ្រេង និងរកចំណូលបានចំនួន៦២០ លានដុល្លារទូទាំងពិភពលោកក្នុងឆ្នាំ២០១១។ «Fast & Furious» វគ្គ៦ រកចំណូលបាន ៧៨៨លានដុល្លារក្នុងរដូវក្ដៅឆ្នាំ២០១៣ ខណៈវគ្គ៧ ចេញមកស្របពេលដែលមានសោកនាដកម្មនៃការស្លាប់របស់ Paul Walker នោះរកចំណូលក្នុងស្រុកសរុបចំនួន ៣៥៣លានដុល្លារ និង ១.៥២ពាន់លានដុល្លារទូទាំងពិភពលោក៕