(ម៉ាទ្រីដ)៖ ខ្សែបម្រើ Luka Modric អាចនឹងខកខានការប្រកួតវគ្គផ្តាច់ព្រ័ត្រ Copa del Rey របស់ Real Madrid ទល់នឹងក្រុម Osasuna និងការប្រកួតជើងទី១ នៃវគ្គពាក់កណ្តាលផ្តាច់ព្រ័ត្រ Champions League ទល់នឹងក្រុម Manchester City បន្ទាប់ពីរងរបួសភ្លៅ។ នេះបើយោងតាមសារព័ត៌មាន Live Score ចេញផ្សាយនៅថ្ងៃទី២៩ ខែមេសា ឆ្នាំ២០២៣។
Modric បានរងរបួសភ្លៅខាងឆ្វេងរបស់លោក អំឡុងពេលប្រកួតចាញ់ ៤-២ របស់ Madrid ក្រោមថ្វីជើងក្រុម Girona កាលពីថ្ងៃអង្គារ។ លទ្ធផលនេះ បាននាំឲ្យពួកគេតាមពីក្រោយក្រុម Barcelona ដែលឈរនៅកំពូលតារាង La Liga ចំនួន ១១ពិន្ទុ។
ការរបួសរបស់ Modric ជាបញ្ហាមួយ សម្រាប់ Real Madrid ដែលពួកគេនឹងបញ្ចប់ការរង់ចាំរយៈពេល ៩ឆ្នាំ ក្នុងការលើកពានរង្វាន់ Copa del Rey នៅថ្ងៃទី០៦ ខែឧសភាខាងមុខ មុនពេលធ្វើជាម្ចាស់ផ្ទះទទួលក្រុម Man City រយៈពេល ៣ថ្ងៃបន្ទាប់៕