(ភ្នំពេញ)៖ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហភាពសហព័ន្ធយុវជនកម្ពុជាវិស័យការងារ និងបណ្តុះបណ្តាលវិជ្ជាជីវៈ និងសាលារៀនចំណេះដឹងទូទៅ វ៉េស្ទឡាញន៍ នាថ្ងៃទី២១ ខែមេសា ឆ្នាំ២០២៣ បានរៀបចំសិក្ខាសាលាស្តីពីការរៀបចំផែនការអាជីព និងជ្រេីសរេីសជំនាញសិក្សា ដល់សិស្សានុសិស្សចំនួនសរុបចំនួន ១០៨៤នាក់ ដែលកំពុងសិក្សានៅសាលារៀនវ៉េស្ទឡាញន៍ នៅទីតាំងទាំង១០ នៅរាជធានីភ្នំពេញ និង ១សាខាទៀតនៅខេត្តបាត់ដំបង។
ពិធីបើកសិក្ខាសាលារយៈពេលពេញមួយថ្ងៃនេះ ត្រូវបានរៀបចំឡើងនៅទីតាំងសាលាវ៉េស្ទឡាញន៍ សាខាច្បារអំពៅ ដោយមានការចូលរួមជាអធិបតីពីលោក តែ ឡាយ ប្រធាននាយកអប់រំនៃសាលាវេស្ទឡាញន៍ និងលោក ស្រី អ៊ូច ជាច័ន្ទមល្លិកា អនុប្រធាន NEA ក្នុងគោលបំណងដើម្បីបញ្ជ្រាបព័ត៌មានទីផ្សារការងារ និងផ្តល់គន្លឹះ ក្នុងការជ្រើសរើសការងារដែលស័ក្តិសមនឹងជំនាញ ចំណូលចិត្ត គុណតម្លៃ និងបុគ្គលិកលក្ខណៈរបស់សិស្ស ដើម្បីរៀបចំផែនការអាជីព និងការសិក្សាដែលឆ្លើយតប ទៅនឹងតម្រូវការទីផ្សារការងារនាពេលបច្ចុប្បន្ន និងអនាគត។
លើកឡើងនាឱកាសនោះលោក តែ ឡាយ ក៏បានបង្ហាញអារម្មណ៍រីករាយដែលបានសហការជាមួយ NEA ក្នុងការរៀបចំសិក្ខាសាលានេះឡើង។ លោកបន្តថា សិក្ខាសាលាដែលបានរៀបចំនាថ្ងៃនេះ នឹងផ្តល់អត្ថប្រយោជន៍សំខាន់ណាស់សម្រាប់សិស្សានុសិស្សទាំងអស់ក្នុងការស្វែងយល់ពីខ្លួនឯងឲ្យច្បាស់ដើម្បីរៀបចំផែនការសិក្សា ក៏ដូចជាជ្រើសរើសជំនាញសិក្សាបន្តបន្ទាប់ពីបញ្ចប់កម្រិតសិក្សាទុតិយភូមិនាពេលខាងមុខ។
បើតាមលោកស្រី អ៊ូច ជាច័ន្ទមល្លិកា បានឲ្យដឹងថា ការណែនាំតម្រង់ទិសជ្រើសរេីសជំនាញ សិក្សាដេីម្បីបន្តទៅថ្នាក់ឧត្តមសិក្សាគឺជារឿងសំខាន់ខ្លាំងដើម្បីជួយដល់សិស្សានុសិស្សក្នុងការរៀបចំផែនការអាជីព និងការសិក្សា ដែលផ្សារភ្ជាប់នឹងតម្រូវការទីផ្សារការងារ។ ជាការពិតការសម្រេចចិត្តលើផ្នែកនេះមិនមែនជាការងាយស្រួលនោះទេ ពីព្រោះសិស្សានុសិស្សម្នាក់ៗត្រូវធ្វើការស្វែងយល់ឲ្យបានស៊ី ជម្រៅអំពីកត្តាពាក់ព័ន្ធនានាដូចជា ការស្វែងយល់ពីកត្តា ខ្លួនឯង ចំណង់ចំណូលចិត្ត ជំនាញ គុណតម្លៃ និងបុគ្គលិកលក្ខណៈដែលស័ក្តិសមសម្រាប់ការសិក្សា មុខវិជ្ជានីមួយៗ។ ដូចច្នេះតាមរយៈសៀវភៅកម្រងសំណួរ ស្វែងយល់ពីខ្លួនឯងនឹងអាចផ្ដល់ជាគន្លឹះ និងព័ត៏មានសម្រាប់សិស្សនុសិស្សធ្វេីការសម្រេចចិត្តប្រកបដោយប្រសិទ្ធភាព និងអាចសម្រេចក្តីសុបិន្តរបស់ពួកគេទាំងក្នុងការសិក្សា នឹងក៏ដូចជាជីវិតការងារជាដើម។
គួរបញ្ជាក់ថា សិក្ខាសាលាស្តីពីការរៀបចំផែនការអាជីព និងជ្រេីសរេីសជំនាញសិក្សា ត្រូវបានរៀបចំឡើងជាប្រចាំ ដោយទីភ្នាក់ងារជាតិមុខរបរ និងការងារ នៅតាមគ្រឹះស្ថានសិក្សា អប់រំ បណ្តុះបណ្តាល ទាំងរដ្ឋ និងឯកជននៅ ទូទាំងប្រទេសតាមរយៈក្រុមការងារមគ្គទេសន៍អាជីព និងមជ្ឈមណ្ឌលការងារ ជូនដល់សិស្សានុសិស្សដោយ ឥតគិតកម្រៃ៕
