(ថៃ)៖ ព្រឹត្តិការណ៍ប្រគំតន្ត្រី WATERBOME នៅក្នុងប្រទេសថៃ ដែលបានធ្វើឡើងក្នុងថ្ងៃបុណ្យចូលឆ្នាំថ្មីកន្លងទៅនេះ គឺមានការចូលរួមពីសំណាក់តារាចម្រៀងល្បីៗជាច្រើន ក្នុងចំណោមនោះគេក៏ឃើញមានតារា K-POP ល្បីម្នាក់ គឺកញ្ញា HyunA ផងដែរ។ ការបង្ហាញខ្លួនរបស់នាង ក្នុងឈុតស្រើបស្រាល អំឡុងពេលសម្តែងច្រៀងលើឆាក បានក្លាយជាប្រធានបទក្តៅលើបណ្តាញសង្គម ខណៈមតិមួយចំនួននិយាយថា នាងស្លៀកពាក់មិនសមរម្យ ខណៈខ្លះទៀតសរសើរពីភាពជឿជាក់ ក្នុងការបង្ហាញភាពសិចស៉ីរបស់នាង។
បើតាមការចេញផ្សាយរបស់សារព័ត៌មានកូរ៉េ Koreaboo បានឲ្យដឹងថា អំឡុងពេលសម្តែងនៅលើឆាក នៃព្រឹត្តិការណ៍ប្រគំតន្ត្រី WATERBOME ក្នុងប្រទេសថៃ HyunA បានទាក់ទាញចំណាប់អារម្មណ៍ អ្នកទស្សនាជាច្រើនមិនថាអ្នកមើលផ្ទាល់ ឬក្នុងបណ្តាញសង្គមនោះទេ ជាមួយនឹងការស្លៀកឈុត Fashion ហែលទឹក ឬគេហៅម្យ៉ាងទៀតថា ឈុតស្រើបស្រាល។ នាងមើលទៅហាក់មានទំនុកចិត្តជាខ្លាំង ពេលនាងរាំ និងសម្ដែង ហើយនាងថែមទាំងរាំញ័រខ្លួន ធ្វើឲ្យអ្នកទស្សនាស្រែកហ៊ោរយ៉ាងខ្លាំងផងដែរ។
ជាមួយគ្នានោះដែរ មហាជនកូរ៉េខ្លះបានយល់ស្របនឹងឈុតនេះដោយថា «ត្រឡប់មកវិញ HyunA ១៣ឆ្នាំមុន », ខណៈខ្លះនិយាយថា «HyunA គឺល្អបំផុតក្នុងអំឡុងពេលនេះហើយ», «នាងស្អាតមិនថានាងធ្វើអ្វី», «នាងដូចជាម៉ាដូណា...», «HyunA អ្នកស្អាតណាស់» ខណៈមួយចំនួនទៀតបញ្ចេញមតិថា «ហេតុអ្វីបានជានាងធ្វើដូច្នេះ? ឈុតនេះមិនសមនឹងនាងស្លៀក ក្នុងនៅក្នុងប្រទេសថៃនោះទេ»។
ទោះយ៉ាងណា នេះមិនមែនជាលើកទីមួយទេ សម្រាប់ HyunA ដែលនាងបង្ហាញខ្លួនក្នុងសម្លៀកបំពាក់សិចស៊ីហួសហេតុបែបនេះ។ ជារឿយៗនាងតែងទទួលការរិះគន់ រឿងស្លៀកពាក់ជាញឹកញាប់ ខណៈតារាស្រី K-pop រូបនេះមិនបានខ្វល់ខ្វាយ នឹងមតិមហាជនសូម្បីតែបន្តិចណាឡើយ៕