(បរទេស)៖ អ្នកសាក់ជនជាតិដើមភាគតិចវ័យ ១០៦ឆ្នាំម្នាក់ គឺលោកយាយ Apo Whang-Od ត្រូវបានគេដាក់បង្ហាញនៅលើក្របទស្សនាវដ្តី Vogue ដែលបានធ្វើឲ្យលោកយាយ ក្លាយជាតារាលើគម្របទស្សនាវដ្តី ដែលមានវ័យចាស់ជាងគេបំផុត។ លោកយាយហ្វីលីពីនអាយុ ១០៦ឆ្នាំរូបនេះ ត្រូវបានគេទទួលស្គាល់ថា បានជួយរក្សាជីវិតទម្រង់សិល្បៈមួយដែលគេស្គាល់ថាជា «batok»។ នេះបើតាមការចេញផ្សាយរបស់សារព័ត៌មាន International The News នៅថ្ងៃទី០៦ ខែមេសា ឆ្នាំ២០២៣។
លោកយាយ Apo Whang-Od បានចាប់ផ្តើមធ្វើជាអ្នកចាក់សាក់តាំងពីអាយុ១៦ឆ្នាំ។ កន្លងទៅ អ្នកសាក់ពីដើមត្រូវបានគេឲ្យឈ្មោះថា «Mambabatok» ឬអ្នកសាក់បុរាណ «Kalinga» ខណៈលោកយាយ Whang-Od បានឲ្យមនុស្សជំនាន់ក្រោយមករៀនរបៀបចាក់សាក់ ដើម្បីជាការផ្ទេរ និងចែករំលែកចំណេះដឹង។ នេះបើតាមទស្សនាវដ្តី Vogue។
ទស្សនាវដ្តី Vogue Philippines បានសរសេរនៅលើ Instagram ថា «ត្រូវបានប្រកាសថាជា mambabatok ចុងក្រោយនៃជំនាន់របស់លោកយាយ, លោកយាយបានបោះត្រានិមិត្តសញ្ញានៃកុលសម្ព័ន្ធ Kalinga ដែលបង្ហាញពីភាពរឹងមាំ ភាពក្លាហាន និងភាពស្រស់ស្អាត នៅលើស្បែករបស់មនុស្សរាប់ពាន់នាក់ ដែលបានធ្វើធម្មយាត្រាទៅកាន់ Buscalan»។ និពន្ធនាយកទស្សនាវដ្តី Bea Valdes បានប្រាប់ CNN ថាបុគ្គលិករបស់ Vogue មិនមានការបែងចែក ឬគិតគូរច្រើននោះទេ ក្នុងការសម្រេចចិត្តដាក់រូបលោកយាយ Whang-Od លើគម្របទស្សនាវដ្ដី។
គួរជម្រាបថា កាលពីឆ្នាំ២០២០ Judi Dench បានក្លាយជាតារាលើគម្របទស្សនាវដ្តី មានវ័យចាស់បំផុតរបស់ British Vogue ស្ថិតក្នុងអាយុ៨៥ឆ្នាំ។ ងាកមកលោកយាយ Whang-Od គ្រោងនឹងបន្តការសាក់រូបឲ្យបានយូរ តាមដែលអាចធ្វើទៅបានបន្តទៀត ដោយមិនបោះបង់អាជីពមួយនេះទេ ទោះមានវ័យ១០៦ឆ្នាំហើយក៏ដោយ៕