(បរទេស)៖ Moana គឺជាប្រភេទភាពយន្តបែបតុក្កតា ចុងក្រោយរបស់ផលិតកម្ម Disney ក្នុងឆ្នាំ២០១៦ ខណៈបច្ចុប្បន្ននេះកំពុងតែត្រូវបានផលិតឡើងវិញ។ នាយកប្រតិបត្តិក្រុមហ៊ុន Disney លោក Bob Iger និងតារាសម្តែង Dwayne Johnson បានប្រកាសពីការផលិតខ្សែភាពយន្តនេះដោយផ្ទាល់ នៅថ្ងៃចន្ទសប្តាហ៍នេះ។ នេះបើតាមការចេញផ្សាយ របស់សារព័ត៌មាន Yahoo នៅថ្ងៃទី០៤ ខែមេសា ឆ្នាំ២០២៣។
បើតាម The Hollywood Reporter បានឲ្យដឹងថា Johnson នឹងសម្តែងជាតួ Maui វិញ ហើយក៏នឹងផលិតរឿងនេះឡើងវិញដែរ ខណៈដែលអ្នកដឹកនាំរឿង មិនទាន់ប្រកាសនៅឡើយ។ អ្នកនិពន្ធរឿងដើម Jared Bush ត្រូវបានគេរំពឹងថា នឹងសរសេររឿងជាមួយ Dana Ledoux Miller។ តួសម្តែងពេញលេញមិនត្រូវបានប្រកាសទេ ប៉ុន្តែតារាសម្តែង Auli'i Cravalho ត្រូវបានគេរំពឹងថានឹងត្រឡប់មកវិញ។ នេះបើយោងតាម Deadline។
រឿង «Moana» ទទួលបានការគាំទ្រយ៉ាងខ្លាំងមិនថា នៅក្នុងស្រុក ឬក៏ក្រៅស្រុកឡើយ ដោយមានបុគ្គលល្បីៗជាច្រើននិយាយពីរឿងនេះ មិនដាច់ពីមាត់ថា ជារឿងមួយដែលខុសពីរឿងតុក្កតាផ្សេងៗទៀត វាបង្កប់ទៅដោយអត្ថន័យអប់រំ និងលើកទឹកចិត្តជាច្រើន។ លើសពីនេះទៅទៀត ការផលិតចេញជារឿងនេះមួយ ត្រូវបានឆ្លងកាត់ការសម្រិតសម្រាំងយ៉ាងយកចិត្តទុកដាក់ ដោយក្រុមការងាររបស់ផលិតកម្ម Disney៕