(ភ្នំពេញ)៖ លោក ទេព រិនដារ៉ូ គឺជាតារាជើងចាស់មួយរូប ដែលចូលប្រឡូកក្នុងវិស័យសិល្បៈសម្តែងអស់រយៈពេល៣ទសវត្សរ៍ជាងមកម្ល៉េះ និងមានប្រជាប្រិយភាពមិនរីងស្ងួតមកដល់សព្វថ្ងៃ។ Fresh News Plus សូមណែនាំប្រវត្តិសង្ខេបមកជូនលោកអ្នក មិត្តអ្នកអានដូចខាងក្រោមថា តើលោក ទេព រិនដារ៉ូ មានអ្វីប្លែកជាងតារាសម័យថ្មី?
* អំពីប្រវត្តិសង្ខេប អំពីជីវិតគ្រួសារ និងការសិក្សា
លោក ទេព រិនដារ៉ូ កើតនៅឆ្នាំ១៩៦៣ (ក្នុងសម័យសង្គមរាស្រ្តនិយម) នៅភូមិសំរោង ស្រុកសង្កែ ខេត្តបាត់ដំបង។ លោកមានឪពុកជាគ្រូបង្រៀន ដែលត្រូវបានស្លាប់ក្នុងរបបខ្មែរក្រហម ម្ដាយរបស់លោកជាអតីតពេទ្យឆ្មប។ លោកជាកូនច្បងក្នុងក្រុមគ្រួសារ ដែលមានបងប្អូន៣នាក់(ប្អូនស្រី២នាក់)។ ប្អូនស្រីម្នាក់បានស្លាប់ហើយបានបន្សល់ទុកក្មួយៗ ឲ្យលោកជួយមើលថែរក្សា។ លោកធ្លាប់បានរៀបការម្តង និងមានកូនស្រីម្នាក់ ហើយលោកបានលែងលះភរិយា នៅឆ្នាំ១៩៨៨។
កាលពីក្មេងលោក ទេព រិនដារ៉ូ បានចូលរៀននៅបឋមសិក្សា និងអនុវិទ្យាល័យ «វត្តនរា» នាខេត្តបាត់ដំបងដែលជាស្រុកកំណើត រហូតមកដល់សម័យខ្មែរក្រហម។ ក្នុងរបប ប៉ុល ពត លោករស់នៅក្នុងកងកុមារ ដោយធ្វើពលកម្មយ៉ាងធ្ងន់ធ្ងរ ដូចប្រជាជនកម្ពុជាទាំងអស់ដែរ។ ក្រោយថ្ងៃរំដោះ៧មករា ឆ្នាំ១៩៧៩ លោកបានវិលមកស្រុកកំណើត ឯខេត្តបាត់ដំបងវិញ ហើយបន្តមកភ្នំពេញដើម្បីបន្តការសិក្សា។ ក្នុងឆ្នាំ១៩៨៣ លោក ទេព រិនដារ៉ូ បានជាប់អាហារូបករណ៍ទៅបន្តការសិក្សា ផ្នែកវិស្វកម្មគ្រឿងយន្តយន្តហោះ និងអ្នកបើកបរយន្តហោះនៅប្រទេសរុស្ស៊ីរយៈពេល៣ឆ្នាំ។ លោកបានវិលមកប្រទេសកម្ពុជាវិញក្នុងឆ្នាំ១៩៨៦ ហើយបានចូលបំរើការក្នុងកងទ័ពអាកាសខ្មែរ ជាពីឡុតបើកយន្តហោះ MIG-21 នាពេលនោះ។
* អំពីស្នាដៃក្នុងវិស័យសិល្បៈ
ក្នុងការងារជាអ្នកបើកបរយន្តហោះ ពិតជាមានរូបរាងស័ក្តិសម និងសង្ហាជាមិនខាននាពេលនោះ ដែលជាហេតុនាំឲ្យអ្នកដឹកនាំខ្សែភាពយន្តពេលនោះចាប់អារម្មណ៍ ហើយបានទាក់ទងលោកឲ្យសម្តែង ក្នុងខ្សែភាពយន្តរឿងដំបូង ក្នុងឆ្នាំ១៩៨៧ គឺរឿង «ទឹកភ្នែកសម្ងាត់ក្នុងរាត្រីពណ៌ស្វាយ» ក្នុងផលិតកម្ម «សូលីវណ្ណ» ដែលជាខ្សែភាពយន្តទី១របស់លោក តែរឿងនោះមិនសូវទទួលបានការចាប់អារម្មណ៍ប៉ុន្មានទេ។ បន្ទាប់មកលោកបានសម្តែងរឿងថ្មីទៀត គឺរឿង «បុប្ផាភ្នំពេញ» ក្រោយមកលោកបានចាប់ដៃគូជាមួយអ្នកនាង អម្ពរ ទេវី ក្នុងរឿង «អាថ៌កំបាំងកិច្ចសន្យា» ក៏ក្លាយជាដៃគូសម្ដែងដ៏ស័ក្តិសមនិងល្បីឈ្មោះ តាំងពីពេលនោះមក។ ចាប់ពីពេលនោះមក លោក ទេព រិនដារ៉ូ ក៏បានសម្ដែងជាច្រើនរឿងទៀត តែក្នុងនោះខ្សែភាពយន្តដែលល្បីឈ្មោះជាងគេ នាពេលនោះគឺរឿង «ឆ្អឹងអណ្ដែត»។
រហូតមកដល់បច្ចុប្បន្ន លោក ទេព រិនដារ៉ូ នៅរក្សាប្រជាប្រិយភាព ហើយលោកក៏នៅតែបន្តក្នុងការសម្ដែងខ្សែភាពយន្តជាច្រើនរឿង ដែលបានដាក់បញ្ចាំងលើផ្ទាំងសំពត់ស ក្នុងរោងភាពយន្ត និងកញ្ចក់ទូរទស្សន៍ មានទាំងខ្សែភាពយន្តភាគ និងខ្សែភាពយន្តខ្នាតធំជាបន្តបន្ទាប់។ ក្នុងរយៈពេលជាង៣ទសវត្សរ៍មកនេះ សមិទ្ធផលនៃការសម្តែងរបស់លោក ទេព រិនដារ៉ូ សម្រេចបានក្នុងរង្វង់ប្រមាណជាជាង១០០រឿង និង MV រាប់រយបទទៀត។
ស្នាដៃមួយទៀតដែលលោក ទេព រិនដារ៉ូ បានចូលរួមសម្តែងគឺរឿង «អច្ឆរិយៈអង្គរ» ជាប្រភេទល្ខោនសម័យទំនើបចម្រុះ ដែលរៀបចំឡើងដោយក្រសួងវប្បធម៌ និងវិចិត្រសិល្បៈ សហការនឹងសហភាពសហព័ន្ធយុវជនកម្ពុជា (ស.ស.យ.ក) រាជធានីភ្នំពេញ និងជាមួយស្ថានីយទូរទស្សន៍បាយ័ន (Bayon) នៅថ្ងៃទី០១ ខែមិថុនា ឆ្នាំ២០១៨ នៅសាលមហោស្រពកោះពេជ្រ។ ក្នុងរឿងដ៏ល្បីនេះលោកបានគ្រងជាតួអង្គ ជនជាតិបារាំង។
* អំពីជីវិតស្នេហា
ចំពោះរឿងស្នេហាវិញ មានមនុស្សមិនច្រើនទេ ដែលបានដឹងថាលោកធ្លាប់បានរៀបការម្តងហើយ ក្នុងឆ្នាំ១៩៨៧នោះ។ នេះមកពីពេលនោះលោកមិនទាន់មានកេរ្តិ៍ឈ្មោះបោះសំឡេងនៅឡើយ ដូច្នេះហើយទើបធ្វើឲ្យអ្នកគាំទ្រថា លោកជាកំលោះចាស់មិនព្រមយកប្រពន្ធ។ តែតាមការពិតលោកធ្លាប់បានរៀបការម្តង ជាមួយនារីម្នាក់ដែលជាការរៀបចំឡើងដោយឪពុកម្ដាយ តែដោយសារតែគ្មានមនោសញ្ចេតនានឹងគ្នា លោកក៏បានលះលែងគ្នាក្នុងឆ្នាំ១៩៨៨ ដោយបានកូនស្រីម្នាក់ជាចំណងអាពាហ៍ពិពាហ៍ជាង១ឆ្នាំនេះ។ ហើយក្រោយមកអតីតភរិយា និងកូនស្រីក៏បានចេញទៅនៅក្រៅប្រទេស។
បើគិតមកដល់សព្វថ្ងៃលោក ទេព រិនដារ៉ូ មានអាយុប្រហែលជាង៥០ឆ្នាំ ហើយលោកត្រូវបានលែងលះភរិយាដំបូងតាំងពីឆ្នាំ១៩៨៨។ តែចាប់ពីពេលនោះមកលោកមិនដែលទំនាក់ទំនងមានស្នេហាជាមួយនារីណាម្នាក់ឡើយ រួមផ្សំដោយមិនសូវមានអ្នកដឹងថា លោកធ្លាប់រៀបការហើយផងនោះ ជាហេតុធ្វើឲ្យអ្នកគាំទ្រក៏ដូចជាអ្នកសារព័ត៌មាន តែងតែលើកជាសំណួរជាញឹកញយថា «ហេតុអ្វីលោកនៅកំលោះយូរយ៉ាងនេះ?» ចំពោះសំណួរនេះលោក ទេព រិនដារ៉ូ ធ្លាប់ចេញមកបកស្រាយជារឿយៗ ថាលោកជាប់ធុរៈបីបាច់រក្សាក្មួយៗជាក្មេងកំព្រា និងក្មួយៗជាកូនរបស់ប្អូនស្រីលោក ដូច្នេះលោកមិនចង់មានបន្ទុកបន្ថែមទៀត ណាមួយលោកបានចាត់ទុកក្មួយៗជាកូនបង្កើត របស់លោករួចទៅហើយដែរ។ ទាំងអស់នេះហើយដែលធ្វើឲ្យលោករស់នៅជាមួយជីវិតគ្មានគូជារៀងរហូតមក។
* អំពីរឿងល្បីក្នុងសារព័ត៌មានកន្លងមក
ចំពោះរឿងល្បីក្នុងសារព័ត៌មាន លោកពិតជាមិនអាចគេចផុតបានឡើយ ដោយលោកជាតារាសម្តែងដែលមានកេរ្តិ៍ឈ្មោះល្បីក្នុងប្រទេស នៅពេលមានសកម្មភាពអ្វីដែលប្លែកនោះ សារព័ត៌មានតែងតែស្រូតចុះផ្សាយព្រោងព្រាត ដើម្បីជាការទាក់ទាញ អ្នកអានរបស់ខ្លួន។ ជាពិសេសព័ត៌មានដែលថាលោក «ហេតុអ្វីលោកនៅកំលោះយូរយ៉ាងនេះ?» ចំពោះចម្លើយវិញ គឺដូចអ្វីដែលបានបង្ហាញខាងលើ ហើយក៏មានព័ត៌មាន ដែលលើកសរសើពីសមទ្ធផលជាស្នាដៃផ្សេងៗ ក្នុងវិស័យភាពយន្ត ជាបន្តបន្ទាប់ដែលលោកបានចូលរួមបង្កើតឡើង។
ក្នុងសម័យទំនើបកម្មនៃវិស័យព័ត៌មានវិទ្យានេះ បានលេចធ្លាយនូវព័ត៌មានមួយដែលមិនគួរកើត នោះគឺរូបភាពសិចស៊ីស្ទើរតែអាក្រាតកាយរបស់លោកតែម្តង ដែលត្រូវបានអ្នកលេងសង្គមហ្វេសបុក យកស៊ែរតៗគ្នានាពេលនេះតែពេលក្រោយមកត្រូវបានគេបញ្ជាក់ថា ជារូបភាពកាត់តដោយបច្ចេកទេសនាសម័យទំនើបកម្មនេះ។
* អំពីទម្លាប់ និងចំណង់ចំណូលចិត្ត
ជាទម្លាប់ជារៀងរាល់ថ្ងៃលោក ទេព រិនដារ៉ូ ហាត់ប្រាណនៅផ្ទះដោយមានឧបករណ៍ហាត់ប្រាណនៅផ្ទះផ្ទាល់ ក្រោយពីទំនេរពីការថតសម្តែង ព្រោះការថតសម្តែងមិនទៀងទាត់។ លោកទទួលទានជាតិស្រវឹង គ្រប់ប្រភេទតែមានកំរិតមធ្យម លោកនិយមទទួលទានទឹកច្រើន លោកទទួលទានអាហារមិនសូវរើសឡើយ។ លោកកម្រចេញក្រៅ ឬទៅកំសាន្តទីផ្សារដោយពុំមានការសំខាន់ឡើយ។ សព្វថ្ងៃលោករស់នៅផ្ទះល្វែង២ជាន់នៅម្តុំពោធ៍ចិនតុង ក្នុសង្កាត់ពោធិ៍សែនជយ។ លោកមានរថយន្តផ្ទាល់ខ្លួន លុចស៊ីស៣៣០ និងអាចមានអចលនៈទ្រព្យផ្សេងទៀត៕