(ប៉ារីស)៖ ពហុកីឡដ្ឋាន នៅក្នុងប្រទេសបារាំង នឹងបើកឡើងវិញ ឲ្យអ្នកគាំទ្រចូលរួមទស្សនា ចាប់ពីថ្ងៃទី១១ ខែកក្កដាខាងមុខនេះ ខណៈប្រទេសកំពុងបន្តដកវិធានការ ដែលបានដាក់ដើម្បីទប់ស្កាត់ ការរីករាលដាល នៃជំងឺ COVID-19, នេះបើតាមការឲ្យដឹងពីរដ្ឋាភិបាល ហើយត្រូវបានចុះផ្សាយដោយសារព័ត៌មាន CNA នាយប់ថ្ងៃទី២០ ខែមិថុនានេះ។
រដ្ឋាភិបាលបារាំង បានឲ្យដឹងថា អ្នកគាំទ្រច្រើនបំផុត៥,០០០នាក់ នឹងត្រូវបានអនុញ្ញាត ឲ្យចូលក្នុងពហុកីឡដ្ឋាន។
ការប្រកួតវគ្គបញ្ចប់ ពានរង្វាន់ French Cup និង League Cup ឥឡូវនេះ អាចប្រកួត ដោយមានអ្នកទស្សនា និងអ្នកគាំទ្រ ចូលរួមទស្សនាក្រុមរបស់ពួកគេ។
គួរបញ្ជាក់ថា លីគបាល់ទាត់ Premier League របស់អង់គ្លេស, លីគ La Liga របស់អេស្ប៉ាញ និងលីគ Bundesliga របស់អាល្លឺម៉ង់ បានចាប់ផ្តើមឡើងវិញ នៅក្នុងខែនេះ ហើយលីគបាល់ទាត់សេរី A របស់អ៊ីតាល ក៏ចាប់ផ្តើមឡើងវិញ នៅថ្ងៃសៅរ៍នេះផងដែរ៕