(ភ្នំពេញ)៖ ដោយរសារតែស្ថានភាពជំងឺ Covid-19 នៅក្នុងប្រទេសកម្ពុជា និងនៅលើពិភពលោក នៅតែជាក្ដីបារម្ភធំសម្រាប់ថ្នាក់ដឹកនាំ ក៏ដូចជាបងប្អូនប្រជាពលរដ្ឋទូទៅនោះ តារាសម្ដែង កញ្ញា ហាស់ វីរ៉ាស្រីរ័ត្ន ហៅរ៉ូស បានបន្តចែកជែលលាងសម្អាតដៃ ប្រមាណ១០០០ដបបន្ថែមទៀត ដល់បងប្អូនអ្នកដំណើរទូទៅ បងៗសមត្ថកិច្ចនៅក្នុងរាជធានីភ្នំពេញ អមដោយសារអប់រំជាច្រើន ស្ដីពីការការពារជំងឺដ៏កាចសាហាវនេះ។
តារាសម្ដែងសិចស៊ី កញ្ញា រ៉ូស បានថ្លែងប្រាប់ Fresh News Plus ពីកន្លែងចែកជែលនាល្ងាចនេះ មកថា រូបនាង និងក្រុមការងារ បាននឹងកំពុងបន្តចែកជែលលាងសម្អាតដៃចំនួន១០០០ដប ដោយមិនគិតថ្លៃ ជូនដល់បងប្អូន ដើម្បីលាងដៃ និងឲ្យមានអនាម័យ នៅតាមដងផ្លូវសាធារណៈ ក្នុងរាជធានីភ្នំពេញ។
តារាសម្ដែងមានរាងតូចច្រឡឹង កញ្ញា រ៉ូស បានប្រាប់បន្តថា កាចែកជែលលាងសម្អាតដៃសម្រាប់ការពារខ្លួន ពីការឆ្លងនៃជំងឺ Covid-19 នៅពេលនេះ គឺជំហានដំបូង នាងចែកជូនដល់បងប្អូន នៅតំបន់មុខព្រះបរមរាជវាំង ដែលជាទីតាំងមានមនុស្សច្រើន មកកំសាន្តលេងសប្បាយ នៅថ្ងៃចុងសប្ដាហ៍នេះ។ ដោយឡែកនៅថ្ងៃចន្ទ ទី២២ ខែមិថុនានេះ តារាសម្ដែង រ៉ូស នឹងនាំយកជែលទៅឧបត្ថម្ភដល់លោកស្នងការ នគរបាលរាជធានីភ្នំពេញ ចំនួន២៥០ដប និងលោកអភិបាលខណ្ឌពោធិសែនជ័យ ចំនួន២៥០ ផងដែរ។
«ច៎ាបង..ពេលនេះខ្ញុំចែកនៅមុខវាំង ហើយថ្ងៃចន្ទខ្ញុំយកជូនលោកស្នងការ និងលោកអភិបាលខណ្ឌពោធិសែនជ័យ ដើម្បីជូនដល់បងៗសមត្ថកិច្ច..!។ ពេលចែកជែលលាងសម្អាតដៃ ខ្ញុំបានប្រាប់ពីសារអប់រំ ការអនាម័យលើខ្លួនប្រាណ ការការពារកុំឲ្យឆ្លងពីវីរុសនានា ជាពិសេសជំងឺកូវីដ១៩ ដែលអាចតាតត្បាតម្ដងទៀត បើបងប្អូនមានការធ្វេសប្រហែស មិនបានការពារខ្លួន តាមការណែនាំរបស់ក្រសួងសុខាភិបាល និងពីការក្រើនរំឭក របស់ថ្នាក់ដឹកនាំកំពូលរបស់ប្រទេស..!។ ខ្ញុំធ្វើនេះចេញពីចិត្តពិតៗ ខ្មែរស្រឡាញ់ខ្មែរ ហើយខ្ញុំក៏សូមអរគុណដល់បងស្រី ឈាង ចន្ទ័ណារី ម្ចាស់ក្រុមហ៊ុន អេឡេនណា ខសមេធីក ខូអិលធីឌី ដែលបានជួយជាជែលលាងដៃ សម្លាប់មេរោគដល់នាងខ្ញុំ»។ តារាសម្ដែងកញ្ញា រ៉ូស បញ្ជាក់បន្ថែម។
ជាការកត់សម្គាល់ ចាប់តាំងពីផ្ទុះករណីនៃជំងឺ Covid-19 នៅក្នុងប្រទេសកម្ពុជាមក គេសង្កេតឃើញមានសិល្បករ-សិល្បការិនីជាច្រើន បានចូលរួមយ៉ាងសស្រាក់សស្រាំ ទប់ស្កាត់ការរីករាលដាលនៃជំងឺនេះ ដោយអ្នកខ្លះបានបរិច្ចាគធនធាន ចូលរួមជាមួយនឹងរាជរដ្ឋាភិបាល និងអ្នកខ្លះទៀតចូលរួមតាមរយៈសកម្មភាពនានា តាមអ្វីដែលខ្លួនអាចធ្វើបាន។
សូមបញ្ជាក់ថា សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបន្តអំពាវនាវដល់ក្រសួង ស្ថាប័នពាក់ព័ន្ធ ត្រូវបន្ដអនុវត្ដសេចក្ដីណែនាំក្រសួងសុខាភិបាល ឲ្យបានម៉ឺងម៉ាត់ ធ្វើយ៉ាងណាទប់ស្កាត់ កុំឲ្យមានការឆ្លងរីករាលដាលជាថ្មី ដល់បងប្អូនប្រជាពលរដ្ឋទូទាំងប្រទេស នៅគ្រប់ទីកន្លែងទាំងអស់ ជាពិសេសកុមារ និងកុមាររស់នៅក្នុងគ្រួសារក្រីក្រ។ ក្រសួង-ស្ថាប័នពាក់ព័ន្ធ ត្រូវខិតខំប្រឹងប្រែងរកលទ្ធភាព ក្នុងការធ្វើយ៉ាងណា ឲ្យមានគ្រប់រូបភាព នៅគ្រប់កន្លែងទាំងអស់ ទទួលបានសេវាអប់រំ អនាម័យស្មើៗគ្នា នៅក្នុងកំឡុងពេលមានការរាតត្បាត នៃជំងឺកូរីដ១៩នេះ៕
