(ភ្នំពេញ)៖ ថ្នាក់ដឹកនាំក្រុមបាល់ទាត់ជម្រើសខេត្តកំពង់ស្ពឺ និងខេត្តត្បូងឃ្មុំ បានបង្ហាញនូវចំណុចខ្លាំងរបស់គូប្រជែងរៀងៗខ្លួន មុនក្រុមទាំងពីរត្រូវជួបគ្នាក្នុងជើងទី១ នៃពានរង្វាន់សម្ដេចតេជោ ហ៊ុន សែន (Hun Sen Cup) ថ្នាក់ខេត្ត លើកទី១៤ វគ្គ ៨ក្រុមចុងក្រោយនាថ្ងៃទី៣០ ខែមិថុនា ឆ្នាំ២០២០ នៅខេត្តកំពង់ស្ពឺ។

លោក ម៉ម កុសល អ្នកចាត់ការក្រុមបាល់ទាត់ខេត្តកំពង់ស្ពឺ បានលើកឡើងមុនបើកទ្វារស្វាគមន៍ក្រុមភ្ញៀវថា ត្បូងឃ្មុំគឺជាក្រុមខ្លាំងមួយ ក្នុងពានរង្វាន់សម្ដេចតេជោ ហ៊ុន សែន ហើយជាម្ចាស់ពានថ្នាក់ខេត្ត ឆ្នាំ២០១៩ ថែមទៀត។ ហេតុនេះក្រុមលោកនឹងព្យាយាមធ្វើឲ្យបានល្អបំផុត ដើម្បីប្រជែងកៅអីវគ្គបន្ដ ពិសេសការប្រកួតជើងទី១ ក្នុងដី សម្រាប់ធ្វើដើមទុនឆ្ពោះទៅប្រកួតជើងទី២ ក្រៅដី។

លោកបញ្ជាក់ថា «ដូចយើងដឹងហើយថា ខេត្តត្បូងឃ្មុំ គឺជាក្រុមលើកពានថ្នាក់ខេត្តឆ្នាំទៅមិញ អញ្ចឹងមិនមែនងាយស្រួលទេ ហើយការលេងក្នុងពូលរបស់ពួកគេកន្លងទៅក៏ធ្វើបានល្អទៀត។ យ៉ាងណាក៏ដោយ សម្រាប់យើង ប៉ះក្រុមក៏ណាក៏លេងដែរ។ អំណោយផលរបស់យើង គឺធ្វើម្ចាស់ផ្ទះនៅជើងទី១ អញ្ចឹងយើងត្រូវប្រឹងធ្វើឲ្យបានល្អ ដើម្បីជាកម្លាំងចិត្ត ហើយដល់ជើងទីពីរ យើងនឹងផ្លាស់ប្ដូរយុទ្ធសាស្ត្រថ្មីទៀត»។

ដោយឡែកលោក ផន រស្មីពេជ្រ គ្រូបង្គោលខេត្តត្បូងឃ្មុំ ក៏បានបង្ហាញនូវសុទិដ្ឋិនិយម ចំពោះខេត្តកំពង់ស្ពឺដែរ ដ្បិតខេត្តកំពង់ស្ពឺ បានបញ្ចប់ការប្រកួតក្នុងពូល ដោយឈរលេខ១ ហើយត្រូវធ្វើម្ចាស់ផ្ទះ នៅជើងទី១ ។ កត្ដានេះ អាចនឹងធ្វើឲ្យក្រុមខ្លួនជួបការលំបាក តែយ៉ាងណាត្បូងឃ្មុំ ក៏បានប្ដេជ្ញានឹងប្រឹងប្រែងឲ្យអស់ពីលទ្ធភាព ដើម្បីប្រជែងលទ្ធផលវិជ្ជមាន មុនទទួលធ្វើម្ចាស់ផ្ទះ នៅជើងទី២ ដែរ។

គ្រូបង្វឹកដឹកនាំត្បូងឃ្មុំលើកពានថ្នាក់ខេត្ត ឆ្នាំ២០១៩ ដដែល បន្ដថា «កំពង់ស្ពឺក៏ជាក្រុមខ្លាំងដែរ ព្រោះគាត់ឈរលេខមួយក្នុងពូល ។ ណាមួយជើងទី១ យើងត្រូវលេងនៅផ្ទះទៀត អញ្ចឹងវាពិបាកខ្លះដែរ។ ខ្ញុំ និងក្រុម បានត្រៀមឆន្ទៈ និងទឹកចិត្តរួចរាល់ហើយ ដើម្បីការប្រកួតជើងទី១ យើងនឹងលេងអស់ពីលទ្ធភាព ដែលយើងមាន ព្រោះជើងទី១ ពិតជាសំខាន់សម្រាប់ចិត្តសាស្ត្រក្រុម ដែលទាមទារត្រូវយកឈ្នះឲ្យបាន»។

សូមបញ្ជាក់ថា កាលពីប្រកួតជម្រុះក្នុងពូល ខេត្តកំពង់ស្ពឺ បានឈរលេខ១ ក្នុងពូល “ឃ” ឯខេត្តត្បូងឃ្មុំ បានឈរលេខ២ ក្នុងពូល “គ” ។ ចំពោះការប្រកួតជើងទី១ រវាងក្រុមទាំងពីរ នឹងត្រូវធ្វើឡើងនៅខេត្តកំពង់ស្ពឺ នាថ្ងៃទី៣០ ខែមិថុនា បន្ទាប់មកទើបខេត្តត្បូងឃ្មុំ បើកទ្វារផ្ទះប្រកួតកាត់សេចក្ដីជើងទី២ ជាមួយខេត្តកំពង់ស្ពឺ នាថ្ងៃទី០៨ ខែកក្កដា ឆ្នាំ២០២០ នៅទីលានវិទ្យាល័យប៊ុនរ៉ានីហ៊ុនសែនមេមត់ ខេត្តត្បូងឃ្មុំ៕