(វ៉ាស៉ីនតោន)៖ ក្រុមហ៊ុនបច្ចេកវិទ្យាយក្សអាមេរិក Google ទើបតែបានដាក់បណ្តឹងវាយបកទៅលើ ក្រុមហ៊ុនផលិតឧបករណ៍បំពង​សំឡេង​ Sonos Inc. ដោយថាក្រុមហ៊ុននេះបានរំលោភកម្មសិទ្ធិបញ្ញារបស់ខ្លួន។ នេះបើតាមការចេញផ្សាយដោយសារព័ត៌មាន Bloomberg នៅថ្ងៃ​សុក្រ ទី១២ ខែមិថុនា ឆ្នាំ២០២០។

បញ្ហាវិវាទរវាងក្រុមហ៊ុនទាំងពីរ ដែលធ្លាប់បានសហការគ្នាលើការបញ្ចូលបច្ចេកវិទ្យាមួយចំនួនរបស់ Google ទៅក្នុងផលិតផលរបស់ Sonos បានផ្ទុះឡើងដំបូងកាលពីខែមករាដើមឆ្នាំនេះ នៅពេលក្រុមហ៊ុន Sonos បានប្តឹងក្រុមហ៊ុន Google ពីបទរំលោភកម្មសិទ្ធិបញ្ញា។ បច្ចុប្បន្ននេះ Sonos កំពុងប្រឈមមុខជាមួយការប្រកួតប្រជែងកាន់តែខ្លាំងឡើង ពីសំណាក់ក្រុមហ៊ុនបច្ចេកវិទ្យាធំៗដូចជា Google និង Amazon ជាដើម ដែលកំពុងតែពង្រីកអាជីវកម្មទៅរកការលក់ឧបករណ៍ភ្ជាប់អ៉ីនធើណិត ដែលប្រើប្រាស់ទូទៅក្នុងផ្ទះ ក្នុងនោះរួមមានទាំងឧបករណ៍បំពង​សំឡេងឥតខ្សែ (Wireless Speaker) ដែលធូរថ្លៃជាងផលិតផលរបស់ Sonos ផងដែរ។

ក្នុងពាក្យបណ្តឹងខាងលើ ក្រុមហ៊ុន Google បានចោទក្រុមហ៊ុន Sonos ថា កំពុងប្រើប្រាស់បច្ចេកវិទ្យាជាច្រើនរបស់ខ្លួន ដោយខុសច្បាប់។ ចំណែកនាយកប្រតិបត្តិរបស់ Sonos វិញ បានបង្ហាញការជឿជាក់ថា ក្រុមហ៊ុនលោកនឹងឈ្នះទាំងក្នុងពាក្យបណ្តឹងដើមរបស់លោក និង​ទាំងក្នុងពាក្យបណ្តឹងថ្មីរបស់ Google។

គួរជម្រាបថា ក្នុងពាក្យបណ្តឹងរបស់ខ្លួនកាលពីខែមករា ក្រុមហ៊ុន Sonos បានអះអាងថា Google ទទួលបានចំណេះដឹងពីបច្ចេកវិទ្យារបស់​ខ្លួន តាមរយៈភាពជាដៃគូគ្នាមួយស្តីពីការរួមបញ្ចូលកម្មវិធី Google Play Music ទៅក្នុងផលិតផល Wireless Speaker របស់ Sonos ដោយ​ខាង​ Google ស្រាប់តែបានផ្តាច់ការសហការនោះ ហើយងាកទៅលក់ឧបករណ៍បំពងសំឡេងផ្ទាល់ខ្លួនតែម្តង៕