(ភ្នំពេញ)៖ រយៈពេលជាច្រើនឆ្នាំចុងក្រោយនេះ តារាចាស់វស្សាមានកេរ្តិ៍ឈ្មោះល្បីល្បាញ លោក ឈឿន ឧត្តម ត្រូវបានគេសង្កេតឃើញថា លោកហាក់ស្ងប់ស្ងាត់ បាត់មុខសូន្យឈឹង ក្នុងវិថីសិល្បៈចម្រៀង ដែលធ្វើឲ្យមហាជនអ្នកគាំទ្រលោក មានការងឿងឆ្ងល់ជាខ្លាំង។ យ៉ាងណាមិញ អ្នកនាង ស៊ិន ឧត្តមផល្លា បានបង្ហើបឲ្យដឹង ពាក់ព័ន្ធនឹងការបាត់មុខ ក្នុងពិភពសិល្បៈអស់រយៈពេលជាច្រើនឆ្នាំមកនេះ គឺដោយសារតែមានតារាចម្រៀងស្រករក្រោយច្រើន ទើបមិនសូវមានការអញ្ជើញលោក ឲ្យឡើងតាមស្ថានីយទូរទស្សន៍ ស្របពេលដែលលោកមានបញ្ហាច្រមុះ និងបំពង់កទៀតនោះ ទើបការងារសិល្បៈស្ងាប់ស្ងាត់តែម្ដង។
ជាក់ស្ដែងអ្នកនាង ស៊ិន ឧត្តមផល្លា ដែលជាម្ចាស់ផេក Movie Star Research បានបង្ហើបឲ្យដឹងអំពីជីវិតបច្ចុប្បន្ន របស់តារាចម្រៀងដ៏ល្បីឈ្មោះ គឺលោក ឈឿន ឧត្ដមពីមូលហេតុនៃការឃ្លាតឆ្ងាយពីសិល្បៈ របស់តារាចម្រៀងរូបនេះ ថា តាមការពិតលោកមិនបានបាត់ទៅណាទេ តែដោយសារតែមានតារាចម្រៀងប្អូនៗ ជំនាន់ក្រោយច្រើន ទើបបានជាមិនសូវមានគេអញ្ជើញលោក ឲ្យឡើងច្រៀងតាមស្ថានីយ៍ទូរទស្សន៍ នឹងម្យ៉ាងទៀតលោកមានបញ្ហាជំងឺ ច្រមុះ និងបំពង់កអស់រយៈ៤ឆ្នាំហើយ ទើបការងារសិល្បៈស្ងប់ស្ងាត់បែបនេះ ទើបតែពេលនេះ លោកបានជាសះស្បើយពីជំងឺ»។
អ្នកនាង ស៊ិន ឧត្តមផល្លា បានប្រាប់បន្តថា «សព្វថ្ងៃនេះលោកមានវ័យ៤៣ឆ្នាំហើយ បច្ចុប្បន្ននេះ ក្រៅពីការងារ លោក ឈឿន ឧត្តម នៅតែបន្តអាជីពជាតារាចម្រៀង ប្រចាំភោជនីយដ្ឋាន ពិភពរាត្រី រួមជាមួយតារាចម្រៀងជើងចាស់ ជាច្រើនដួង»។
គួររំឭកផងដែរថា លោក ឈឿន ឧត្ដម គឺជាតារាចម្រៀងដ៏ល្បីល្បាញ ផ្នែកចម្រៀងមនោសញ្ចេតនា លោកចូលប្រឡូកក្នុងពិភពសិល្បៈនាឆ្នាំ ១៩៩៨ តាមរយៈការប្រឡងចម្រៀងក្នុងកម្មវិធី «គន្លងតារា» របស់ស្ថានីយ៍ទូរទស្សន៍ប៉ុស្ថិ៍លេខ៥ ដោយលោកទទួលបានជ័យលាភីលេខ ២ និងក្រោយមក លោកមានកេរ្តិ៍ឈ្មោះល្បីល្បាញខ្លាំង នៅក្នុងផលិតកម្ម រស្មីស្ទឹងសង្កែ មានដូចជាបទ ខ្លាចរកាដែក, ឱបស្រមោល, រនោចខែប្រាំង, ទឹកភ្នែកជនពាល, ទូរស័ព្ទអ្នកណា? និង ប្រពន្ធនរណាគេហ្ន៎ ព្រមទាំងបទចម្រៀងល្បី មួយចំនួនទៀត៕
