(អាឡឺម៉ង់)៖ ពិតជារឿងមួយដ៏កម្រ និងជាទស្សនិយភាពគួរឲ្យជក់ចិត្ត ខណៈដែលមានស្រី្ដវ័យ៨០ឆ្នាំ ពីរនាក់ បានដឹកដៃគ្នាឡើងមកសម្ដែងក្បាច់រាំលើឆាក រួមទាំងបញ្ចេញសមត្ថភាព និង ទេពកោសល្យ រៀងៗខ្លួន នៅក្នុងកម្មវិធីលំដាប់ថ្នាក់ពិភពលោក Got Talent នៅប្រទេសអាឡីម៉ង់។
នៅក្នុងវគ្គ Audition លោកយាយទាំងពីររូប មានឈ្មោះថា Roswitha Wahl និង Renate Recknagel បានទទួលការចាប់អារម្មណ៍យ៉ាងខ្លាំង ពីសំណាក់ទស្សនិកជន ជាពិសេសបន្ទាប់ពីលោកយាយទាំងពីរ បានបញ្ចេញក្បាច់រាំ យ៉ាងរស់រវើក នៅទល់មុខអ្នកទស្សនា នៅលើឆាក។ លោកយាយទាំងពីរ ក៏បានសហការគ្នាយ៉ាងល្អ និង បង្ហាញក្បាច់រាំប្រកបដោយរលូន ស៊ីចង្វាក់គ្នា តែម្ដង។ ជាពិសេស គណៈកម្មការទាំងបីរូប ពិតជាមានការពេញចិត្ត និងសប្បាយរីករាយ ក្នុងការទស្សនានូវការសម្ដែង របស់លោកយាយទាំងពីរផងដែរ។
សូមជម្រាបថា កម្មវិធីលំដាប់ពិភពលោក Got Talent អាឡីម៉ង់ ឆ្នាំ ២០១៨ បានប្រព្រឹត្តិទៅជាច្រើនដំណាក់កាល ហើយក្នុងនោះបេក្ខជន-បេក្ខនារី មកពីជុំវិញតំបន់ បានដាក់ពាក្យចូលរួមប្រកួតប្រជែង បញ្ចេញទេពកោសល្យ ដែលខ្លួនមានឲ្យអស់ពីសមត្ថភាព ដើម្បីដណ្ដើមឆ្លងទៅដល់វគ្គផ្ដាច់ព្រ័ត្រ និងដណ្ដើមបានជយលាភីផងដែរ។