(ភ្នំពេញ)៖ ពិតជាគួរឲ្យអាណិតអាសូរជាខ្លាំង ខណៈឃើញរូបរាងកាយរបស់វីរៈសិល្បៈ អ្នកគ្រូ គង់ ណារី ដែលធ្លាប់តែស្រស់បស់ សាច់ថ្លាប្រែមកជាស្រគត់ស្រគំ ស្គមស្គាំង ខុសប្លែកពីមុនដាច់តែម្តង ដោយសារប្រឈមនឹងជំងឺដ៏ធ្ងន់ធ្ងរ។ អ្នកគ្រូ គង់ ណារី ដែលត្រូវបានគេដឹងថា គឺជាសាស្ត្រាចារ្យ អក្សរសាស្ត្រខ្មែរប្រចាំនៅវិទ្យាល័យវត្តកោះ កំពុងធ្លាក់ក្នុងជំងឺប្រភេទកាចសាហាវជាយូរមកហើយ ដោយនៅមិនទាន់ធូរស្រាលទេ ខណៈដំណឹងមួយនេះ ប្រៀបបានដឹងការជូនដំណឹង ដល់អ្នកសិល្បៈថ្មីចាស់ទាំងអស់ ដែលបានស្គាល់អ្នកគ្រូ ឲ្យដឹងពីស្ថានភាពអ្នកគ្រូពេលនេះ។
ពាក់ព័ន្ធនឹងការធ្លាប់ខ្លួនឈឺពីសំណាក់ អ្នកគ្រូ គង់ ណារី ពេលនេះ ត្រូវបានប្រភពច្បាស់ការណ៍អះអាងថា អ្នកគ្រូ បានធ្លាក់ខ្លួនឈឺជាយូរមកហើយ ដោយក្នុងមួយរយៈដែលឈឺធ្ងន់ គឺបានត្រឹមតែសំងំព្យាបាល នៅស្រុកកំណើតស្ថិតនៅខេត្តកំពង់ឆ្នាំង។ តាមបណ្តាញសង្គមរបស់លោក ឌួង តារា ផាឌីន កាលពីពេលថ្មីនេះ បង្ហាញពីសភាពរបស់ អ្នកគ្រូ គង់ ណារី មានភាពស្គមស្គាំង និងបានសរសេរសារយ៉ាងដូច្នេះថា «អ្នកគ្រូសិល្បៈ គង់ណារី គឺជា វិរៈសិល្បការិនី និងជាសាស្រ្តាចារ្យ អក្សរសាស្រ្តខ្មែ និងសិល្បៈពេលនេះអ្នកគ្រូកំពុងមានជំងឺធ្ងន់ធ្ងរ (ក្រិនថ្លើម និងដុំសាច់កាច) ដូច្នេះរាល់បងប្អូនសិល្បករ-សិល្បការិនី ទាំងចាស់ ទាំងថ្មី ដែលធ្លាប់គោរពស្រឡាញ់ចំពោះអ្នកគ្រូ សូមទទួលជ្រាបដឹងឮ ទាំងអស់គ្នាជាព័ត៌មាន»។
ពេលបានដឹងនូវដំណឹងនេះហើយ ក៏មានការសោកស្តាយ និងអាណិតអ្នកគ្រូយ៉ាងខ្លាំង ខណៈគ្មានលទ្ធភាពក្នុងការព្យាបាលជំងឺ ដោយក្រុមគ្រូពេទ្យអះអាងថា ដុះដុំសាច់កាចរបស់អ្នកគ្រូ ត្រូវតែធ្វើការវះកាត់ និងព្យាបាលដោយម៉ត់ចត់បំផុត៕